ئەمڕۆ سێشەممە 20ی کانونى دووەمى 2026،نەقیبى سەندیکاى سەندیکای ڕۆژنامەنووسانی عێراقى، بەڕێز “موئەیەد ئەللامی” لە نوسینگەی خۆی لە بەغدا، لەگەڵ سەرۆکى نوێنەرایەتی حکومەتی هەرێمی کوردستان بەڕێز “فارس عیسا” و شاندی یاوەری کۆبووەوە.
لە میانی کۆبوونەوەکەدا، پێداچوونەوەیان بە پێشهاتەکانی ئێستای هەرێمی کوردستان و عێراق و ناوچەکه کرد و، جەختیان لە گرنگی هەوڵە هاوبەشەکان کردەوە، بۆ پاراستنی عێراق لە کاردانەوەی گرژییەکانی ئێستا لە ناوچەکە.
هەروەها لە کۆبوونەوەکەدا ،باس لە ڕۆڵی میدیا کرا، لە بەهێزکردنی یەکڕیزی نیشتمانی و پاڵپشتیکردنی پارت و هێزە سیاسییەکانى بەشدار لە پرۆسەی سیاسیدا، بۆ چارەسەرکردنی کێشە و ناکۆکییە سیاسییەکان.
لای خۆیەوە بەرپرسی نوێنەرایەتی حکومەتی هەرێمی کوردستان لە بەغدا، دووپاتی کردەوە کە میدیا ، ڕۆڵێکی سەرەکی دەگێڕێت لە بنیاتنانی سیستەمێکی سیاسی دروست لە وڵاتدا، لەسەر بنەمای یاسا و دەستوور.
لە کۆتایی کۆبوونەوەکەدا، نەقیبى سەندیکای ڕۆژنامەنووسانی عێراق، سوپاس و پێزانینی خۆی، بۆ ڕۆڵی نوێنەرایەتی حکومەتی هەرێمی کوردستان لە بەغدا، لە بتەوکردنی پەیوەندی و هەماهەنگی نێوان، وەزارەت ودامودەزگاکانی هەردوو حکومەتی فیدراڵی وهەرێمی کوردستان دەربڕی.