کۆنفیدراسیۆنی ڕەوەندی کوردستانی بانگەوازێکی سەرتاسەریی ئاراستەی ڕەوەندی کوردستانی لە هەموو وڵاتانی جیهان کرد، تا بە مەبەستی ڕێگریکردن لە کۆمەڵکوژی و ڕاگرتنی هێرشەکانی سووپای عەرەبیی سووریا بۆ سەر ڕۆژئاوای کوردستان، دەست بە چالاکی و فشارە دیپلۆماسییەکانیان بکەن.
له بانگەوازهكهیاندا هاتووه: “کۆنفیدراسیۆنی ڕەوەندی کوردستانی، وەک چۆن لە ڕابردوودا هەمیشە سەنگەرێکی پتەوی یەکخستنی دەنگی کورد و پشتیوانێکی بێ مەرجی هەموو پارچەکانی کوردستان بووە، ئەمڕۆش لەسەر هەمان ڕێبازی نەتەوەیی و نیشتمانی بەردەوامە، ئێمە لە ڕوانگەی ئەو باوەڕە نەگۆڕەی کە جەنابی سەرۆک مەسعود بارزانی هەمیشە پێداگری لەسەر دەکات، ئەویش پاراستنی گەلی کورد و شکۆیی نەتەوەییە لە هەر چوار پارچەی کوردستان، بە ئەرکی خۆمان دەزانین لەم ساتە هەستیارەدا دەنگمان هەڵببڕین.”
ئاماژه بۆ ئهوهش كراوه: “ئێمە بە توندی هێرشە دڕندەکانی سوپای عەرەبیی سووریا و شۆڤێنی و توندڕۆکان بۆ سەر ڕۆژئاوای کوردستان و خەڵکی سڤیلی ئەو ناوچانە مەحکوم دەکەین، کە تێیدا کۆمەڵکوژی و تاوان دژی مرۆڤایەتی ئەنجام دەدرێت، ئەم هێرشانە تەنیا کردەوەیەکی سەربازی نین، بەڵکوو هەوڵێکی ئاشکران بۆ شکاندنی شکۆی کورد، تێکدانی دیمۆگرافیا و کوشتنی هاووڵاتییانی بێتاوان کە ساڵانێکە قوربانیی گەورەیان بۆ ئارامیی جیهان و بەرگری لە مرۆڤایەتی دژ بە تیرۆریستانی داعش داوە.”
هاوكات ههر له بانگهوازهكهی دیاسپۆرا ئهوهش خراوهته ڕوو: “کۆنفیدراسیۆنی ڕەوەندی کوردستانی داواتان لێ دەکات لە هەر وڵات و شارێکی جیهانن، بە تێکڕا و بە یەکدەنگیی، بەشداریی هەموو ئەو خۆپیشاندان و چالاکییە مەدەنییانە بکەن بەپێی یاسا مەدەنییەکانی ئەو وڵاتانە و بەشێوەیەکی ئارام، دژی هێرشەکانی سوپای سووریا و بۆ پشتیوانیی لە خوشک و برایانمان لە ڕۆژئاوا ڕێکدەخرێن. هەروەها بە شێوەیەکی سەردەمییانە و بەبێ بەکارهێنانی درووشمی توندوتیژی، فشار بخەنە سەر حکومەت، پەرلەمان و ناوەندە بڕیاردەرەکانی ئەو وڵاتانەی تێیدا دەژین.”
له بانگهوازهكهی کۆنفیدراسیۆنی ڕەوەندی کوردستانی ئهوهش هاتووه، داوا لە کۆمەڵگەی نێودەوڵەتی بکەن بە پەلە بێنە سەر هێڵ بۆ ڕاگرتنی ئەم کۆمەڵکوژییە و پاراستنی هاووڵاتییانی بێتاوان لە گواستنەوەی زۆرەملێ. ئێمە وەک کۆنفیدراسیۆن، ڕایدەگەیەنین کە بە شێوەیەکی فەرمی نامە و ڕاپۆرتی وردمان لەسەر بارودۆخی مەترسیداری ڕۆژئاوا ئاڕاستەی ناوەندە بڕیاردەرەکانی ئەورووپا و دامەزراوە نێودەوڵەتییەکان کردووە، مێژوو سەلماندوویەتی کە توندوتیژی نابێتە جێگرەوەی گفتوگۆی سیاسی و مافە ڕەواکانمان ناتەپێندرێن.”
له ناوهڕۆكی بانگهوازهكهدا باس لهوهش كراوه: “با هەموو پێکەوە ببینە دەنگی مەزڵوومییەتی ڕۆژئاوا و ڕێگە نەدەین جارێکی تر گەلەکەمان ڕووبەڕووی جینۆساید ببێتەوە ڕایدەگەیەنین، لە هەردوو شاری کۆڵن و هانۆڤەری ئەڵمانیا، کۆنفیدراسیۆنی ڕەوەندی کوردستانی گەورەترین خۆنیشاندان و ناڕەزایی دژی هێرشەکانی دیمەشق بۆ سەر ڕۆژئاوای کوردستان ڕێک دەخات، بۆیە داوا لە کوردستانیانی دیاسپۆرا دەکات، هەموو بەگوڕ و تینەوە بەشداریی ئەو خۆنیشاندانە فراوانە بکەن.”