بەپێی ئامارە فەرمییەکان، هەزاران کەس چارەسەریان وەرگرتووە و ژمارەیەک لە نەخۆشخانە و بنکە تەندروستییەکان زیانیان بەرکەوتووە
وەزارەتی تەندروستیی ئێران ڕایگەیاندووە کە لە دوو حەفتەی ڕابردوودا، نزیکەی ٢١ هەزار هاووڵاتی لە ئەنجامی هێرشەکانی ئەمریکا و ئیسرائیلدا بریندار بوون.
بەپێی ڕاگەیەنراوی وەزارەتەکە، لەم ماوەیەدا ١٩٥٠٦ هاووڵاتی لە نەخۆشخانەکاندا چارەسەریان وەرگرتووە. هەروەها ١١١١ کەس بەهۆی قووڵیی برینەکانیانەوە هێشتا لە نەخۆشخانەکان خەوێنراون و بۆ ٨٠٠ کەسیش نەشتەرگەری کراوە.
وەزارەتی تەندروستیی ئێران ئاماژەی بەوەش کردووە کە لە هەمان ماوەدا ١٠١ کەس لە ستافی تەندروستیش بریندار بوون.
بەپێی ئامارەکان، شەش نەخۆشخانە چۆڵ کراون، ١٨٠ بنکەی تەندروستی و ٣٧ ناوەندی دەرمانی زیانیان بەرکەوتووە. هەروەها ٤٧ بنکەی فریاکەوتنی خێراش کەوتوونەتە بەر هێرش.
وەزارەتی تەندروستی هەروەها ڕایگەیاندووە کە زۆرترین زیان و بەرکەوتن لە پارێزگاکانی تاران و هورمزگان تۆمار کراوە.
