پاشنيوه‌ڕۆى ئەمڕۆ هەینی 2026/4/17 بەڕێز نێچیرڤان بارزانی، سەرۆکی هەرێمی کوردستان، لە میانی کارنامەکەیدا لە کۆڕبەندی دیپلۆماسیی ئانتالیا، لەگەڵ بەڕێز هامیش فالکۆنەر، وەزیری دەوڵەتی بەریتانیا بۆ کاروباری ڕۆژهه‌ڵاتی ناوه‌ڕاست، کۆبووەوە.

لە کۆبوونەوەکەدا، پەرەپێدانی پەیوەندییەکانی هەرێمی کوردستان و عێراق لەگەڵ بەریتانیا، دوایین پێشهاتەکانی دۆخی سیاسی و پرۆسەی پێکهێنانی حکوومەت لە عێراق و هەرێمی کوردستان تاوتوێ کران. هەردوولا جەختیان لە گرنگیی تەبایی و یەکڕیزیی لایەنە کوردستانییەکان کردەوە بۆ پاراستنی دەستکەوتەکان و تێپەڕاندنی ئاڵنگارییەکان.

تەوەرێکی دیکەی دیدارەکە، دۆخی ئاڵۆزی ناوچەکە و لێکەوتەکانی شەڕ و ڕەوشی سووریا بوو. لەمبارەیەوە وەزیری دەوڵەتی بەریتانیا سوپاسی ڕۆڵی ئەرێنیی سەرۆک نێچیرڤان بارزانی کرد لە هەوڵەکانی بۆ چەسپاندنی ئاشتی و سەقامگیری لە عێراق و سووریا.

هەردوولا هاوڕا بوون لەسەر ئەوەی کە تەنیا لە ڕێگەی دیپلۆماسی و ئاشتییەوە دەتوانرێت کێشەکان چارەسەر بکرێن و ناوچەکە لە مەترسیی پێکدادانی زیاتر بپارێزرێت.