هێڵە ئاسمانییەکانی جیهان لە لێواری پەرەسەندنی هەڵوەشاندنەوەی گەشتەکاندان

لوفتهانزا یەکەی سیتی لاینی خۆی داخست، ٢٧ فڕۆکەی لە خزمەتگوزاری دەرکرد و فڕۆکە گەورە کۆن و زۆرخۆرەکانی لەکار خست.
بلومبێرگ بە لێکۆڵینەوە لە کاریگەرییەکانی شەڕی ئەمریکا و کۆماری ئیسلامی نووسیویەتی گەشتیارانی هێڵە ئاسمانییەکان دەبێت خۆیان بۆ مانگەکانی داهاتووی باشتر ئامادە بکەن، چونکە کۆمپانیاکانی فڕۆکەوانی لە سەرانسەری جیهاندا وەک کاردانەوەیەک بەرانبەر بە بەرزبوونەوەی لەڕادەبەدەری نرخی سووتەمەنیی فڕۆکە، گەشتەکان هەڵدەوەشێننەوە و فڕۆکەکان لەکار دەخەن.
بەپێی ئەم ڕاپۆرتە، کۆمپانیای فڕۆکەوانیی “کەی ئێڵ ئێم”ی هۆڵەندی نوێترین کۆمپانیایە خشتەی کارەکانی خۆی کەم کردووەتەوە و ڕایگەیاندووە مانگی داهاتوو ٨٠ گەشتی گەڕانەوە لە فڕۆکەخانەی سخیپۆلی ئەمستردام هەڵدەوەشێنێتەوە.
یونایتد ئێرلاینز، لوفتهانزا و کاتای پاسیفیکیش پێشتر خشتەی کارەکانی خۆیان کەم کردبووەوە.
بەپێی داتاکانی کۆمپانیای شیکاریی سیریۆم، توانای جیهانیی گەشتەکان بۆ مانگی ئایار نزیکەی لەسەدا ٣ کەم بووەتەوە و ١٩ کۆمپانیا لە کۆی ٢٠ گەورەترین کۆمپانیای فڕۆکەوانیی جیهان گەشتەکانی خۆیان کەم کردووەتەوە.
ئاژانسی نێودەوڵەتیی وزە دەڵێت ئەورووپا “لەوانەیە بۆ شەش هەفتە” سووتەمەنیی ماوەی هەبێت. یەکێتیی ئەورووپاش ڕایگەیاندووە لەوانەیە “لە داهاتوویەکی نزیکدا” ڕووبەڕووی کێشەکانی دابینکردنی سووتەمەنیی فڕۆکە ببێتەوە و سەرقاڵی ئامادەکردنی پلانێکی کاری هاوبەشە.
لوفتهانزا، گەورەترین کۆمپانیای فڕۆکەوانیی ئەورووپا، یەکەی سیتی لاینی خۆی داخست، ٢٧ فڕۆکەی لە خزمەتگوزاری دەرکرد و فڕۆکە گەورە کۆن و زۆرخۆرەکانی لەکار خست.
ئێر کەنەدا گەشتەکانی خۆی لە مۆنتریال و تۆرۆنتۆوە بۆ نیویۆرک هەڵوەشاندووەتەوە و هێڵە ئاسمانییەکانی نێجیریاش هۆشدارییان داوە لەوانەیە لە ڕۆژانی داهاتوودا گەشتەکان بوەستێنن.
کانتاسی ئوسترالیاییش بە مەزەندەکردنی بەرزبوونەوەی ٥٧٥ ملیۆن دۆلاریی تێچووی سووتەمەنی، گەشتەکانی خۆی بۆ ئەمریکا کەم دەکاتەوە.
بلومبێرگ هەروەها لە زمان شرۆڤەکارانەوە نووسیویەتی: “ئەگەر نرخی سووتەمەنیی فڕۆکە بۆ ماوەیەکی درێژ بە بەرزی بمێنێتەوە، هەڵوەشاندنەوەی گەشتەکان زیاتر دەبێت.”