دوای چاوەڕوانییەکی زۆر، پلاتفۆڕمی (Apple TV+) یەکەمین ترەیلەری وەرزی چوارەمی زنجیرەی کۆمیدی و درامی “Ted Lasso“ بڵاوکردەوە، کە بڕیارە لە 5ـی ئابی داهاتوو پەخش بکرێت.
ئەم وەرزە نوێیە گۆڕانکاری گەورە لە ڕەوتی چیرۆکەکەدا نیشان دەدات و جەخت لەسەر لایەنە مرۆیی و سۆزدارییەکان دەکاتەوە کە زنجیرەکە پێی ناسراوە.
تێد لاسۆ، بە ڕۆڵگێڕانی جەیسن سودیکیس، دوای ماوەیەک دابڕان و گەڕانەوەی بۆ ئەمریکا بۆ لای کوڕەکەی، جارێکی دیکە دەگەڕێتەوە بۆ یانەی ڕیچمۆند، بەڵام ئەمجارە ئەرکێکی جیاواز و چاوەڕواننەکراوی پێ دەسپێردرێت.
لە وەرزی چوارەمدا، لاسۆ دەبێتە ڕاهێنەری تیمی خانمانی یانەی ڕیچمۆند، ئەوەش هەنگاوێکە کە لە کۆتایی وەرزی پێشوودا ئاماژەی پێکرابوو.
ئەم گۆڕانکارییە دەبێتە هۆی دروستبوونی کۆمەڵێک ململانێی ئەرێنی و بارودۆخی کۆمیدی نوێ لەناو یاریگا و دەرەوەی یاریگادا. زۆربەی ئەکتەرە سەرەکییەکان وەک هانا وادینگھام و بریت گۆڵدستاین دەگەڕێنەوە بۆ بەرجەستەکردنی ڕۆڵەکانیان.
بینەرانی ئەم زنجیرەیە کە لە سێ وەرزی ڕابردوودا سەرکەوتنێکی بێوێنەی بەدەستهێنا، بە پەرۆشەوە چاوەڕێی بینینی شێوازی مامەڵەکردنی تێد لاسۆ دەکەن لەگەڵ ئەم ئەزموونە نوێیەدا، کە بێگومان پڕ دەبێت لە پەیامی هیوا و گەشبینی، وەک هەمیشە.