هێزە ئەمنییەکانی ویلایەتە یەکگرتووەکانی ئەمریکا ڕایانگەیاند، ئەو کەسەی ئێوارەی دوێنێ لە نزیک کۆشکی سپی هێرشی کردە سەر ئەفسەرانی تەناهی، دوای برینداربوونی گیانی لەدەست داوە.
بەپێی ڕاگەیەندراوی فەرمی هێزە ئەمنییەکان، ڕووداوەکە دوای کاتژمێر ٦:٠٠ی ئێوارە بە کاتی ناوخۆیی واشنتن ڕوویداوە. پیاوێک بەرەو یەکێک لە خاڵەکانی پشکنینی کۆشکی سپی ڕۆیشتووە و لەناکاو چەکێکی لەنێو جانتاکەی دەرهێناوە و دەستبەجێ تەقەی لە ئەفسەرانی ئاسایش کردووە.
ئەفسەرانی پاراستنی کۆشکی سپی وەڵامی تەقەکانیان داوەتەوە و هێرشبەرەکەیان بریندار کردووە. هەرچەندە بە مەبەستی چارەسەر گەیەندراوەتە نەخۆشخانە، بەڵام بەهۆی سەختی برینەکەیەوە گیانی لەدەست داوە.
تا ئێستا ناسنامەی هێرشبەرەکە و هۆکاری پشت هێرشەکە لەلایەن لایەنە پەیوەندیدارەکانەوە ئاشکرا نەکراوە و لێکۆڵینەوە لە ڕووداوەکە بەردەوامە.