لویس دیلا فۆنتی راهێنەری هەڵبژاردەی ئیسپانیا لیستی کۆتایی یاریزانانی بۆ بەشداریکردن لە جامی جیهانی راگەیاند، کە لە گۆڵپارێزیدا پشت بە هەریەکە لە ئۆنای سیمۆن و داڤید رایا و خوان گارسیا دەبەستێت.
لە هێڵی بەرگریدا ناوی لاپۆرت، کوبارسی، کۆکۆریا، ئیرک گارسیا و مارکۆس لۆرێنتی دەبینرێت، هاوکات لە ناوەڕاستی مەیدانیشدا رۆدری، پێدری، گاڤی، زووبیمێندی و میرینۆ ئەرکی کۆنتڕۆڵکردنی یارییەکەیان پێسپێردراوە.
بۆ هێڵی هێرشبردنیش، دیلا فۆنتی متمانەی بە تواناکانی لامین یاماڵ، ئۆریازاباڵ، نیکۆ ولیامز، فیران تۆرێس و ئۆلمۆ بەخشیوە.
ئەوەی ئەم لیستەی کردووەتە جێگای مشتومڕ و سەرنجی میدیا وەرزشییەکان، ئەو جیاوازییە گەورەیە لە نێوان یانەکانە؛ بە جۆرێک کە هیچ یاریزانێکی یانەی ریاڵ مەدرید لەم لیستەدا نابینرێت، ئەمەش رووداوێکی دەگمەنە.
لە بەرامبەردا، حەوت یاریزانی یانەی بەرشەلۆنە بانگێشت کراون و پشکی شێریان لە پێکهاتەکەدا بەرکەوتووە. ئەم بڕیارەی دیلا فۆنتی بە شێوەیەکی چاوەڕواننەکراو هاوسەنگی وڵامدانەوەکانی لەناو جەماوەری وەرزشیدا گۆڕیوە و چاوەڕوان دەکرێت لە رۆژانی داهاتوودا گفتوگۆی زیاتری لەسەر بکرێت.