لە ڕۆژانی جەژندا بەهۆی کەشوهەوای فێنک و سروشتی دڵڕفێنی ناوچەکە، ژمارەیەکی زۆر لە گەشتیاران بۆ بەسەربردنی کاتێکی خۆش ڕوویان لە سەیرانگەکانی سنووری قەزای ئامێدی وەک سۆلاڤ، ئینیشکێ و ئاشەوا کردووە. قەلەباڵغییەکی زۆر لەو سەیرانگەیانە بەدی دەکرێت و جمەیان دێت لە گەشتیار.
خاوەن شوێنە گەشتیارییەکان بە ئامادەکاریی تەواوەوە پێشوازی لە میوانان دەکەن، هاوکات گەشتیارانیش دڵخۆشی خۆیان لەسەر سروشت و خزمەتگوزارییەکانی ناوچەکە نیشان دەدەن.
ئەم جموجۆڵە گەشتیارییە بووەتە هۆی بوژاندنەوەی بازاڕی ناوچەکە، بەرپرسانی ناوچەکەش هەوڵەکانیان چڕ کردووەتەوە بۆ دابینکردنی کەشێکی ئارام و خزمەتگوزاریی پێویست، تاوەکو گەشتیاران بتوانن بە باشترین شێوە چێژ لە پشووی جەژن وەربگرن.