وەزیری دارایی عێراق، فالح ساری لەگەڵ شاندی بانکی جیهانی بە سەرۆکایەتیی بەڕێوەبەری هەرێمی، ژان کریستۆف کارێ، کۆبووەوە بۆ تاوتوێکردنی ئاسۆکانی هاوکاریی تەکنیکی و دامەزراوەیی و پاڵپشتیکردنی چاکسازیی دارایی و ئابووری لە وڵاتدا.
گرنگترین خاڵەکانی کۆبوونەوەکە:
پاڵپشتی بۆ بوودجەی داهاتوو: لە کۆبوونەوەکەدا میکانیزمەکانی هاوکاری لەگەڵ بانکی جیهانی بۆ پێشکەشکردنی ڕاوێژ و پاڵپشتیی تەکنیکی لە ئامادەکردنی بوودجەی گشتیی داهاتوودا باسی لێوەکرا، بە ئامانجی بەرزکردنەوەی کارایی پلاندانانی دارایی، ڕێکخستنی خەرجییەکان و پاراستنی سەقامگیریی دارایی لە ژێر ڕۆشنایی گۆڕانکارییە ئابوورییەکانی ئێستادا.
بەردەوامیی چاکسازییەکان: وەزیری دارایی جەختی کردەوە کە وەزارەت بەردەوامە لە جێبەجێکردنی چاکسازییە داراییەکان کە پشت بە پەرەپێدانی ئیدارەی دارایی، زیادکردنی داهاتە ناونەوتییەکان و نوێکردنەوەی سیستمی بانکی، باج و گومرگ دەبەستێت، بە جۆرێک لەگەڵ کارنامەی حکومەتدا بگونجێت.
سوودوەرگرتن لە شارەزایی نێودەوڵەتی: سارێ ئاماژەی بە گرنگیی سوودوەرگرتن لە ئەزموونەکانی بانکی جیهانی کرد، بەتایبەت لە بوارەکانی بنیاتنانی توانای دامەزراوەیی، داڕشتنی سیاسەتی دارایی، پاڵپشتیکردنی پڕۆژە گەشەپێدەرەکان و هاندانی وەبەرهێنان.
پشتیوانیی بانکی جیهانی: لای خۆیەوە، شاندی بانکی جیهانی دووبارە پاڵپشتیی خۆی بۆ حکومەتی عێراق ڕاگرت لە جێبەجێکردنی بەرنامەکانی چاکسازیی دارایی و ئابووریدا، بە ئامانجی بەهێزکردنی سەقامگیریی دارایی و بەدیهێنانی گەشەپێدانی بەردەوام.