شەیما مستەفا
سەرەدانا سەروك مەسعود بارزانی بو پایتەختێ عێراقێ پشتی دەمەك درێژ پەیامەكا بهێزە، ڕەنگڤەدان و ئەنجامێن ڤێ سەرەدانێ بێگومان دێ د دەمەك کورت دا دیار بن و ئەنجام بو دەمێن درێژ دێ هەبن ، هەڤدیتنێن وی لگەل بەرپرسێن عێراقێ هەر ژ نوکە ئەنجامێن باش هەبوون ، ئەڤە ژ ڕەنگڤەدانا دیارە کو هەمی لایەن ل سەر وێ چەندێ کوکن و ئێك دەنگن خالا چارەسەریێ یە ، بڕیاڕێن دژی هەرێمێ هاتین داین و ئاریشێن هەلاویستی دێ د ڤێ سەرەدانێ دا هێنە چارەسەر کرن ، سیاسەتا ژیرانە یا سەرکردێ کورد ئەو چەندە دیار کریە کو ئاریشە بتنێ ب دیالوگ و دان و ستاندنا چارەسەر دبن نەك ب زەبڕ و توند وتیژیێ ، ئاریشا ڕاگرتنا ڕەوانە کرنا پەترولا هەرێمێ بو دەرڤە ، نەدان و گیروکرنا مووچەیێن فەرمانبەرێن هەرێما کوردستانێ و دەرکرنا بڕیارێن دژی هەرێمێ د بیاڤێ هەڵبژارتنان دا هندەك ژ ئاریشێن هەڕە مەزنن و ئاستەنگن بەرامبەر هەرێما کوردستانێ. سەرەدانا مەسعود بارزانی بو پایتەختێ عێراقێ کو د هەمان دەم دا ناڤەندەك گرنگە ل ڕوژهەلاتا ناڤین دێ بت کلیل بو چارەسەکرنا ئاریشەیێن هەیی دناڤبەرا هەرێما کوردستانێ و عێراقێ دا ، نەك بتنێ بو عێراقێ بەلکی بو دەڤەرێ هەمیێ ژی گرنگیا خوە هەیە.ب کورتی دشێن بێژین دپلوماسیەت تاکە چارەیە.هەروەسا ژ لایێ باوەری و سیاسی ژی دێ ئەنجامێن باش هەبن ژ بەر کو عێراق پێتڤی ب ئاشتیا جڤاکی هەیە و وەلاتێن پێشکەفتی ب پێکڤە ژیانێ دشێن خوە پێشکەفتی کر بکەن.