نڤێسەر و چالاکڤان( شەیما مستەفا)
ئێکگرتن تنێ پەیڤەک نینە، بەلکو د بنەرەت دا فەلسەفەیەکا کویر و دیرۆکییە. مروڤایەتیێ هەر ژ دەستپێکێ ب رێکا کارێ هەڤپشک شیاینە خۆ ل هەمبەر ئاستەنگان رابگرن و مافێن خۆ بپارێزن. بۆ نەتەوێ کورد، کو دیرۆکەکا تژی ژ ستەم و دابەشکاری ل سەر هاتیە سەپاندن، ئێکگرتن ژ هەر دەمەکێ دیتر پتر پێدڤی و زەروورەتە.
هەلوویستێ دوژمنان و زەنگا هۆشیاریێ
ئەو چەندا دبنە ئەگەرێ مەترسیێ ئەوە کو نەیارێن مللەتێ کورد، سەرەڕای هەمی ناکۆکیێن خۆ یێن سیاسی، ئابووری و ئایدیۆلۆژی، ل دەمێ بابەت دگەهیتە پرسا کوردی، هەمی دبنە خودان ئێک هەلویست. ئەڤە زەنگەکا هۆشیاریێ یە بۆ مە؛ چونکی هەر دەمێ کورد ژ بەر بەرژەوەندیێن حزبی یان ئایدیۆلۆژیێن جودا پارچە ببن، نەیار ب ساناهی دشێن کۆنترۆلا ئاخ و چارەنڤیسێ مە بکەن.
شەرێ سەردەم و ئامرازێن نووی
ل جیهانا ئەڤرۆ دا، وەلاتێن زلهێز ئێدی راستەوخۆ ناچنە د شەڕێن بەرەيی دا، بەلکو شەڕ بوویە شەڕێ تەکنۆلۆژیا، دپلوماسیەت و وەکالەتێ. د ڤێ قۆناغێ دا، کورد پێدڤی ب ئالوگۆریا هێزێ و یەکدەنگیێ نە دا کو خوینا گەنجێن مە ب خۆڕایی نەڕێژیت. دیسان پێدڤی یە بزانین کو شەڕ بتنێ ب چەکی ناهێتە کرن؛ زانست و پەروەردە ئامرازێن هەرە بهێزن بۆ ئاڤاکرنا نەوەیەکێ هۆشیار کو هەستێ نەتەوایەتی تێدا ببتە شەنگستەیەکێ نەهێژێت.
رۆڵێ سەرکردایەتیێ و پاراستنا دەستکەفتان
د ڤێ قۆناغا هەستیار دا، رۆڵێ دیار و کارایێ سەرۆک مەسعوود بارزانی و حکومەتا هەرێما کوردستانێ ب سەرۆکاتیا مەسرور بارزانی د بەرچاڤ و بلندن. بزاڤێن دپلوماسی یێن سەرۆک بارزانی، ژ وان ژی سەرەدانا وی بۆ ئیتالیا و دیدار دگەل پاپایێ ڤاتیکانێ، پەیامەکا روون بوو بۆ گەهاندنا دەنگێ مەزلوومیا کوردێن رۆژئاڤا بۆ جیهانێ.
هەروەسا ب دەستپێشخەریا مەسرور بارزانی و ب رێکا دەزگەهێ خێرخوازیێ بارزانی، ب سەدان کاروانێن هاریکاریێ گەهشتنە دەستێ برایێن مە ل رۆژئاڤا، کو ئەڤە ب خۆ سەلماندنا وێ چەندێ یە کو چ سنوور و ئاستەنگ نەشێن مللەتێ کورد ژ ئێک جودا بکەن.
دەرئەنجام
ئێکگرتن هێزا مەیا هەرە مەزنە. خەلکێ کوردستانێ، چ ل ناڤخۆ یان ل دەرڤەی وەلاتی، ب خۆنیشاندان و هەلویستێن خۆ نیشان دا کو کورد یەک جەستەنە. تەنێ ب هەبوونا ئێک ستراتیژیەت و ئێک هەلویست، ئەم دشێین دەستکەفتێن خۆ بپارێزین و بەرەڤ پاشەرۆژەکا گەشتر هەنگاڤان ب هاڤێژین.