رۆژی پێنجشەممە ٣٠ی ٧ی ٢٠٢٦، لە هۆڵی شەهید مەهدی خۆشناو، لە لقی هەولێری یەكێتی نووسەرانی كورد، بە ئامادەبوونی ژمارەیەكی زۆر لە ئەدیبان و هونەرمەندان و رۆشنبیران،، ڕێوڕەسمێكی ڕێزلێنان بۆ وریا ئەحمەد بەڕێوەچوو.
ڕێوڕەسمەكە لەلایەن شاعیر و نووسەر مەسعود پەرێشان بەڕێوە برا و لە كورتە پێشەكییەكدا تێیدا تیشكی خستە سەر ژیان و بەرهەمەكانی وریا ئەحمەد، دواتر هونەرمەند د. بەیان مانی رێزلێنانەكەی بۆ هونەرمەند رێکخست، پاشان هونەرمەند د. ئامانج غازی باسێكی سەبارەت بە كار و بەرهەمە موزیكییەكانی وریا ئەحمەد و ئاوازەكانی كرد و تیشكی خستە سەر ئەو خزمەت و داهێنانەی لە ماوەی چەندین ساڵ كاركردن.
ئاماژەی بۆ ئەوەشکرد، وریا ئەحمەد توانیویەتی موزیكی كوردی دەوڵەمەند بكات و خۆیشی وەك یەكێك لە هونەرمەندە هەرە دیارەكانی بواری موزیك، ساڵەهای ساڵە لەو بوارە خزمەتی گەورەی بە موزیكی كوردی و هونەری كوردی بەگشتی كردووە و شایستەی هەموو ڕێزلێنان و پێزانینێكە. بۆیە ئەم ڕێوڕەسم و باسكردنە، ڕێزلێنانێكی تایبەت بوو بەو هونەرمەند و مامۆستایەی بەخششێكی زۆری لە بواری پەروەردە و موزیكدا هەیە و یەكێكە لە سمبولەكانی هونەری موزیكی كوردی.
سیروان عوسمان، بەڕێوەبەری گشتی هونەر و رۆشنبیری هەولێر، چەپكێ گوڵی پێشكەش بە وریا ئەحمەد كرد و هیوای تەمەنێكی شایان و بەردەوامیی لە بواری هونەردا بۆ خواست.