حەمەی حەمەسەعید، وەزیری ڕۆشنبیری و لاوانی حکومەتی هەرێمی کوردستان، ئەمڕۆ سێشەممە، لە فڕۆکەخانەی نێودەوڵەتیی هەولێر، پێشوازی لە غەسان سەلامە، وەزیری ڕۆشنبیری لوبنان کرد.
لە ڕێوڕەسمی پێشوازییەکەدا شێروان عەوڵڵا، بەڕێوەبەری گشتیی ڕاگەیاندن و چاپ و بڵاوکردنەوە و نامق هەورامی، بەڕێوەبەری ڕاگەیاندن و پەیوەندییە گشتییەکان لە دیوانی وەزارەت ئامادەبوون.
لە دیدارێکدا، وەزیری ڕۆشنبیری و لاوان وێڕای پێشوازی، خۆشحاڵی خۆی دەربڕی بۆ ئامادەبوونی غەسان سەلامە لە ڕێوڕەسمی کردنەوەی پێشانگەی نێودەوڵەتیی هەولێر بۆ کتێب و هیوای سەرکەوتنی زیاتری بۆ خواست.
هەر لەو چوارچێوەیەدا پرسی پەیوەندی نێوان هەردوو وەزارەت خرایە بەرباس و وەزیری ڕۆشنبیری و لاوان ئامادەیی پیشان دا بۆ داڕشتنی کارنامەیەکی هاوبەش بۆ بنیاتنانی پردی کولتووری نێوان گەلی کوردستان و گەلی لوبنان.