ئێوارەی یەکشەممە بە ئامادەبوونی مەدان گۆپال کونسوڵی گشتی هیندستان لە هەرێمی کوردستان، کۆڕێکی تایبەت بە ناساندن و بەردەستخستنی کتێبی “فەلسەفەی گاندی لە هزری من دا” لە ماڵی وەفایی ساز کرا.
لە کۆڕەکەدا کە فەرهەنگ غەفوور بەڕێوەبەری گشتی رۆشنبیری و هونەری پارێزگای هەولێر، فەلاح حەسەن سەرۆکی فەرمانگەی رێکخراوە ناحکوومییەکان لە هەرێمی کوردستان و کۆمەڵێک لە کەسایەتی ئەکادیمی، نووسەر و توێژەران ئامادەبوون، تەیار گۆران نووسەری کتێبەکە، وێڕای خستنەڕووی ناوەڕۆکی کتێبەکەی، هەڵوەستەی لەسەر فەلسەفە و دنیابینی “گاندی” کرد، بەتایبەتیش سەرنجەکانی لەسەر فەلسەفەی ناتوندوتژی لە هزی گاندی و پاڵپشتی ئەو، لە گەل و نەتەوە چەوسێنراوەکان چڕ کردەوە.
هەر لە کۆڕەکەدا، مەدان گۆپال کونسوڵی گشتی هیندستان لە هەرێمی کوردستان، وتەیەکی لەبارەی هزر و دنیابینی گاندییەوە پێشکەش کرد.
لە کۆتایی کۆڕەکە و بە واژۆی نووسەر، کتێبەکە پێشکەش بە ئامادەبووان کرا.