بە چاودێری و ئامادەبوونی حەمەی حەمەسەعید، وەزیری رۆشنبیری و لاوانی حکومەتی هەرێمی کوردستان، بڕیارە سبەی دووشەممە دیداری “سۆشیالمیدیا پانتاییەک لە روانگەی یاساییەوە” بە بەشداری لایەنە پەیوەندیدارەکان و سەندیکا و شارەزایانی بواری میدیا و رۆژنامەنووسان بەڕێوەبچێت.
دیدارەکە دوو رۆژ دەخایەنێت، تێیدا گفتوگۆ لەبارەی روانگەی وەزارەت و لایەنە پەیوەندیدارەکانی حکومەتی هەرێمی کوردستان و مامۆستایانی زانکۆ و ناوەندە میدیاییەکان بۆ چارەسەری گرفتەکانی سۆشیالمیدیا و دیدگای یاسایی لە هەمبەر ئەو پرسە دەکرێت.
لە دیدارەکەدا، ژمارەیەکی بەرچاو لە رۆژنامەنووسانی کوردستان لە پارێزگاکانی هەولێر، سلێمانی، دهۆک و هەڵەبجە و ئیدارە سەربەخۆکانی زاخۆ، سۆران، راپەڕین و گەرمیان بەشدار دەبن.
ئامانجی سەرەکی لە سازکردنی دیداری “سۆشیالمیدیا پانتاییەک لە روانگەی یاساییەوە”، دروستکردنی گفتوگۆیەکی کراوە و بنیاتنەرانەیە بۆ چارەسەری گرفتەکانی ژینگەی میدیایی.