بە ئامادەبوونی ئاریان سەلاحەدین، بریکاری وەزارەتی رۆشنبیری و لاوان و ژمارەیەکی بەرچاو لە توێژەر و نووسەر و رۆشنبیران و کەسایەتییە کۆمەڵایەتییەکانی دەڤەرەکە، لە بارزان “دیداری جزیری” بەڕێوەچوو.
بریکاری وەزارەتی رۆشنبیری و لاوان، سوپاس و پێزانینی وەزارەتی ئاڕاستەی رێکخەر و سەرپەرشتیارانی دیدارەکە کرد و هیوای خواست، ئاوڕی زیاتر لە بەرهەمی شاعیر و کەسایەتییە هەڵکەوتووەکانی مێژووی وێژەی کوردی بدرێتەوە و خزمەتی زیاتر بکرێن.
ئاریان سەلاحەدین، گوتیشی: ئەو عیرفان و تێگەیشتنە رووحیەی مەلای جزیری پێی گەیشتووە، لە فیکر و عیرفانی بارزاندا بەرجەستەیە.
هەروەها گوتی: وەک چۆن گرنگە ئەمڕۆ لە بارزان باسی مەلای جزیری دەکرێت، گرنگیشە لە دهۆک زیاتر نالی شاعیر بناسرێت و لە سلێمانی ئەحمەدی خانی و لە قامیشلۆ هەژاری موکریانی و لە مهاباد جگەرخوێن بناسرێن و کاری زیاتریان لەسەر بکرێت.
دیدارەکە بە چاودێری نووسینگەی مەلا مستەفا بارزانی و بە پشتیوانیی وەزارەتی رۆشنبیری و لاوان – بەڕێوبەرایەتیی رۆشنبیری و هونەری بارزان، بە دروشمی “جزیری و بارزان دوو فێرگە و یەک عیرفان” سازکرا.
هەروەها چەند پانێلێک بۆ خستنەڕووی لایەنە جیاجیاکانی عیرفان و ناوەڕۆکی عیرفانی کوردیی لە شیعری مەلای جزیری پێشکەش کران.