رۆژی دووشەممە، ئومێد خۆشناو، پارێزگارى هەولێر، لە دیوانى پارێزگا، پێشوازیی لە ئەلبێرت هیتان، سەرۆکى سەندیکاى رۆژنامەنووسانى یەکێتى ئەوروپا و شاندێکى یاوەرى کرد.
لە دیدارەکەدا، دۆخى رۆژنامەگەرى و کارى میدیایى و ئازادیى رۆژنامەگەرى و رادەربڕین و یاساکانى ئەو بوارە لە هەرێمى کوردستان تاوتوێ کران و هەردوولا جەختیان لە گرنگیى پاراستنى ئازادیى رۆژنامەگەرى و رادەربڕین وەک یەکێک لە بنەما سەرەکییەکانى دیموکراسى کردەوە و بەرەوپێشچوون و کێشەکانى ئەو بوارە لە ناوچەکە بەگشتى خرانە روو و بیروڕا لەبارەیانەوە ئاڵوگۆڕ کران.
پارێزگارى هەولێر، ئاماژەى بەوەدا کە دەستەبەرکردنی ئازادى رادەربڕین و ئازادى رۆژنامەوانى یەکێکە لە ئامانجەکانى حکومەتى هەرێمى کوردستان، ئەمەش وایکردووە چەندین کەناڵى گەورە و دەزگاى میدیا زۆر لە کوردستان دورستبێت و بوارى رۆژنامەگەرى بە گشتیى لە هەرێمى کوردستاندا پێ بنێتە قۆناخێكی پێشکەوتوو.
هەروەها رایگەیاند، کارى رۆژنامەنووسى تەنها پیشەنییە، بەڵکو بەرپرسیاریەتییەکى کۆمەڵایەتییە، بۆیە پێویستە رۆژنامەنووس بە پابەندبوون بە یاساکانى هەرێمى کوردستان و ئیتیكی کارى رۆژنامەگەرىی بەرپرسانە مامەڵە لەگەڵ گواستنەوەى وێنە بکات و پەیامەکانی بە راستگۆیی بگەێنێت.
سەرۆکى سەندیکاى رۆژنامەنووسانى یەکێتى ئەوروپا، جەختى لەسەر هەماهەنگى سەندیکاکەیان لەگەڵ سەندیکا و رێکخراو و لایەنەکانى دیکەى پەیوەندیدار بە کارى رۆژنامەوانى لە هەرێمى کوردستان کردەوە.