رۆژی یەکشەممە، لە هۆڵی رۆشنبیریی شاری هەولێر، خولی هەشتەمی فێستیڤاڵی نێودەوڵەتیی شانۆ بە بەشداری دەیان تیپی شانۆی ناوخۆ و دەرەوە دەستیپێکرد.
فێستیڤاڵەکە لەلایەن وەزارەتی رۆشنبیری و لاوان، بەڕێوبەرایەتیی گشتیی رۆشنبیری و هونەری هەولێر، بەڕێوبەرایەتیی شانۆی هەولێر سازکراوە و ئاریان سەلاحەدین، بریکاری وەزارەتی رۆشنبیری و لاوانی حکومەتی هەرێمی کوردستان تێیدا ئامادەبوو.
جگە لە تیپەکانی شانۆ لە هەرێم، ژمارەیەک تیپی شانۆی وڵاتانی تونس، لیبیا، میسر، ئێران، تورکیا و عێراق بەشدارن و بڕیارە هەفتەیەک بەردەوام بێت.
لیژنەیەکی پێنج کەسی وەک لیژنەی هەڵسەنگێنەران، سەرپەرشتی پڕۆسەی هەڵسەنگاندنی بەرهەمە هونەرییەکان دەکەن و ئەندامانی لیژنەکە پێکهاتوون لە ژمارەیەک کەسایەتی دیاری بواری شانۆی کوردی وڵاتانی ئێران و میسر.
ئاریان سەلاحەدین، بریکاری وەزارەتی رۆشنبیری و لاوانی حکومەتی هەرێمی کوردستان پوختەیەکی لە بارەی گرنگی سازکردنی فێستیڤاڵەکە باس کرد و وێڕای بەخێرهێنانی سەرجەم میوانانی فێستیڤاڵ پشتیوانی وەزارەتی بۆ ئەو هەنگاوە هونەرمەندانی پایتەخت دووپاتکردەوە و بە هەنگاوێکی گرنگی ناساند.
لە بەشێکی دیکەی وتارەکەدا، بریکاری وەزارەت باسی لە پشتیوانی و بەدەمەوەهاتنی حکومەتی هەرێمی کوردستان بۆ سەرخستنی پڕۆژە هونەری و رۆشنبیرییەکان لە هەولێری پایتەخت و سەرجەم ناوچەکانی کوردستان کردەوە، کە ساڵانە لەسەر بنەمای پلانێکی ورد چالاکییە هونەری و رۆشنبیرییەکان لە پارێزگا و ئیدارە و ناوچە جیاجیاکانی هەرێمی کوردستان و کەرکووک بەڕێوەدەچن.