کۆمپانیای “20th Century Studios” دەستپێکردنی وێنەگرتنی بەشی دووەمی فیلمی بەناوبانگی “The Devil Wears Prada”ـی راگەیاند. ئەمەش لە کاتێکدایە کە جەماوەرێکی زۆر بە پەرۆشەوە پێشوازییان لە هەواڵەکە کرد، بەتایبەت دوای پشتڕاستکردنەوەی گەڕانەوەی کاستی سەرەکیی فیلمەکە، لە سەرووی هەموویانەوە مێریل ستریپ، ئان هاساوای و ئیمیلی بلەنت.
بۆ بەشە نوێیەکە، کۆمەڵێک ئەستێرەی دیار بەشداری دەکەن، لەوانە لوسی لیو، جەستن سیرۆ، بی. جەی. نۆڤاک، پۆلین شاڵامێ، سیمۆن ئاشلی، و کینێس برانا کە رۆڵی هاوژینی کارەکتەری میراندا پریستلی (مێریل ستریپ) دەگێڕێت. هەروەها ئەکتەری کۆمیدی کەیڵەب هیرۆن، ئەستێرەی برۆدوەی کۆنراد ریکامۆرا و ئەکتەر هێلین جەی. شین بەشدار دەبن.
ترەیسی تۆماس دووبارە رۆڵی “لیلی” دەبینێتەوە، کە هاوڕێی ئاندی بوو، شانبەشانی تێبۆر راڤیتز کە رۆڵی سەرۆکی ئەنجومەنی کارگێڕی گۆڤارە خەیاڵییەکەی “رەنوەی” دەگێڕێت، بەڵام لە بەرامبەردا، ئەدریان گرێنییەر ناگەڕێتەوە بۆ رۆڵی پێشووی وەک “نەیت کوپەر”.
فیلمە رەسەنەکە، لە 2006 بڵاوکرایەوە، ناوەڕۆکی لە رۆمانێکی لۆرین وایزبێرگەرەوە وەرگیراوە.