رۆژی دووشەممە، ٢١ـی ٧ـی ٢٠٢٥ – د. سالار عوسمان، بەرپرسی بەشی رۆشنبیریی و راگەیاندنی پ.د.ک، بە ئامادەبوونی ژمارەیەک لە ئەندامان و هەڤاڵانی بەش، پێشوازیی کرد لە بەرپرس و دەستەی بەڕێوەبردنی ناوەندی رۆشنبیریی و هزریی داستانی خواکوڕک کە ناوەندی سەرەکیی کارکردنیان قەزای سیدەکانە.
لە دیدارەکەدا، د.سالار عوسمان، باسی لە گرنگیی رێکخراوەکانی کۆمەڵی مەدەنی کرد، کە دەتوانن رۆڵی زۆر باش لە خزمەتکردنی بواری رۆشنبیریی و کولتوور و پاراستنی مێژووی پڕ سەروەری گەلی کوردستاندا ببینن. هەروەها، هەوڵ و کارەکانی ناوەندی رۆشنبیریی و هزریی داستانی خواکوڕکی بەرز نرخاند و پشتیوانیی بەشی رۆشنبیریی و راگەیاندنی پ.د.ک ـی بۆ بەرنامە و کارەکانی داهاتووی ناوەندەکە دووپاتکردەوە.
ناوەندی رۆشنبیریی و هزریی داستانی خواکوڕک، لە ساڵی (٢٠٢٣)، دامەزراوە، ژمارەیەک لە کەسایەتیی رۆشنبیری سنوورەکە سەرپەرشتی دەکەن، پڕۆژە و بەرنامەی کاریان، گرنگیدانە بە مێژووی پڕ شانازیی گەلی کوردستان لەنێویاندا (داستانی خواکوڕک).
قەزای سیدەکان سەربە ئیدارەی سەربەخۆی سۆرانە، لە باکووری پارێزگای هەولێر، یەکێکە لە سنورە ستراتیژییەکانی کوردستان و رێڕەوێکی گرنگی بارزگانییە، لە شۆڕش و خەبات و قوربانیدا هەردەم ئەم ناوچەیە پشکی شێری بەرکەوتووە.