رۆژی سێشەممە 30ـی ئەیلوولی 2025 لە سۆران، بە ئامادەبوونی حەمەی حەمەسەعید، وەزیری ڕۆشنبیری و لاوانی حکومەتی هەرێمی کوردستان و هەڵگورد شێخ نەجیب، سەرپەرشتیاری ئیدارەی سەربەخۆی سۆران، ڕێوڕەسمێک بۆ ناساندنی 19 کتێبی نوێ لە سنووری ئیدارەی سەربەخۆی سۆران بەڕێوەچوو.
ئەو کتێبانە بەرهەمی نووسەرانی ناوچەکەن و بە هاوکاری وەزارەتی ڕۆشنبیری چاپ کراون.
وەزیری ڕۆشنبیری و شاندێکی یاوەری سەردانی ئیدارەی سەربەخۆی سۆرانیان کرد و لەلایەن سەرپەرشتیاری ئیدارەکە و ژمارەیەک لە بەرپرسانی کارگێڕییەوە پێشوازی گەرمیان لێکرا. دواتر وەزیری ڕۆشنبیری و شاندی میوان ئامادەی ڕێوڕەسمی ناساندنی کتێبە چاپکراوە نوێیەکان بوون. لەو ڕێوڕەسمەدا هەریەک لە جێگری سەرپەرشتیار، قائیمقام و بەڕێوبەرە گشتییەکان و بەرپرسانی حکومی سنوورەکە ئامادەبوون.
بەڕێوەبەری بەڕێوەبەرایەتی ڕاگەیاندن و چاپ و بڵاوکردنەوەی سۆران، هەڵگورد شێخ نەجیب، سەرپەرشتیاری ئیدارەی سەربەخۆی سۆران، لە وتەیەکدا بەخێرهاتنی میوانانی کرد و ڕایگەیاند: “لە ئیدارەی سەربەخۆی سۆران پشتیوان و هاوکاری نووسەران دەبین و دەستخۆشی لە ستافی بەڕێوبەرایەتیی ڕاگەیاندن و چاپ و بڵاوکردنەوەی سۆران دەکەین بۆ ئەم دەستپێشخەرییە”.
دواتر حەمەی حەمەسەعید، وەزیری ڕۆشنبیری و لاوان، سوپاسی ئیدارەی سەربەخۆی سۆرانی کرد بۆ پشتیوانی بەردەوامیان لە بواری ڕۆشنبیریدا و بەڵێنی پشتیوانی و هاوکاری زیاتری بە بەڕێوەبەرایەتی ڕاگەیاندن و چاپ و بڵاوکردنەوەی سۆران دا و ڕایگەیاند، وەزارەت هەرچی لە توانایدا بێت درێغی ناکات بۆ خزمەتی بوارەکانی ڕۆشنبیری و هونەر و کار دەکات بۆ ئەوەی بودجەی چاپکردنی 50 کتێبی دیکە لە سنوورەکە دابین بکات.