دوای نزیکەی سێ ساڵ لە وەستان و چاوەڕوانی، ئەستێرەی گەشەسەندوی هۆلیوود، سیدنی سوینی، گەڕانەوەی خۆی بۆ بەشداریکردن لە وێنەگرتنی وەرزی سێیەم و کۆتایی زنجیرەی بەناوبانگی “Euphoria” ڕاگەیاند.
سوینی لە لێدوانێکیدا لە کاتی بەشداریکردنی لە فێستیڤاڵی فیلمی ئەمریکی، ئاماژەی بەوە کرد، زۆر بە پەرۆشە بۆ دەستپێکردنەوەی کارکردن لەسەر زنجیرەکە و گوتی: “هەست دەکەم دەگەڕێمەوە بۆ لای خێزانەکەم”.
جەختی لەوە کردەوە، زۆربەی ئەندامانی تیمی کارکردن هەمان کەسانی پێشوون، ئەمەش هەستێکی ئارام و خۆشی پێدەبەخشێت، چونکە لە تەمەنی بیست ساڵییەوە لەگەڵیاندا کار دەکات.
هۆکاری دواکەوتنی بەرهەمهێنانی ئەم وەرزە بۆ مانگرتنی سەرتاسەریی نووسەران و ئەکتەران لە ساڵی ٢٠٢٣ و دواکەوتنی تەواوبوونی سیناریۆکە لەلایەن نووسەر و داهێنەری زنجیرەکە، سام لێڤنسن، دەگەڕێتەوە. پلاتفۆرمی HBO پێشتر ڕایگەیاندبوو کە ئەمە دواین وەرزی زنجیرەکە دەبێت و چاوەڕوان دەکرێت کۆتاییەکی شایستە بۆ چیرۆکی کارەکتەرەکان دابنێت.