لە دانیشتنێکی چای پاشنیوەڕۆدا لە لەندەن، کەیت وینسڵێت باسی لە وردەکارییەکانی فیلمی “Goodbye June” کرد، کە یەکەم ئەزموونیەتی وەک دەرهێنەر.
فیلمەکە چیرۆکێکی خێزانییە لە وەرزی کریسمسدا و سیناریۆکەی لەلایەن کوڕە ٢١ ساڵانەکەیەوە (جۆ ئەندەرز) نووسراوە.
وینسڵێت ئاماژەی بەوە دا، سەرەتا پلانیان وابوو دەرهێنەرێکی تر بهێنن، بەڵام نەیتوانی دەستبەرداری چیرۆکەکە بێت. سەبارەت بە هەڵبژاردنی تیمەکە وتی: “دەبوایە کەسانێک هەڵبژێرم کە بتوانن ڕۆڵەکان بەرجەستە بکەن و لە هەمان کاتدا کەسانی باش بن، چونکە نامەوێت کەسێک بێت مامەڵەی قورس بێت”.
فیلمەکە لە ماوەی تەنها 35 ڕۆژدا وێنەگیراوە و هێلین میرێن تێیدا ڕۆڵی دایکێک دەگێڕێت کە تووشی شێرپەنجە بووە.
وینسڵێت گوتی ئەزموونی دایکایەتی خۆی بەکارهێناوە بۆ ئاراستەکردنی ئەکتەرە منداڵەکان و پێی وتوون: “دیالۆگەکان لەبەر مەکەن و هەڵەی زۆر بکەن” تاوەکو سروشتی دەربکەون.
بڕیارە فیلمەکە لە ١٢ی کانوونی یەکەم لە سینەما و ٢٤ی کانوونی یەکەم لە نێتفلێکس نمایش بکرێت.