ئەمڕۆ دووشەممە، لە ڕێوڕەسمێكدا لە هەولیر، لە پای ئەزموون و بەخششیی سەندیکای هونەرمەندانی کوردستان – لقی هەولێر، بە هەماهەنگی پارێزگای هەولێر، خەڵاتی ڕێزلێنانی بەخشییە هونەرمەند ئەیام ئەکرەم ناسراو بە شەمۆ.
ڕێوڕەسمێكە بە چاودێری ئومێد خۆشناو، پارێزگاری هەولێر و بەئامادەبوونی فەرهەنگ غەفور، بەرێوەبەری گشتیی ڕۆشنبیری و هونەر و هیوا سوعاد، سەرۆکی لقی هەولێری سەندیکای هونەرمەندان و ژمارەیەك لە هونەرمەندان بەڕێوەچوو.
لە ڕێورەسمەكەدا، پارێزگارى هەولێر، لە وتارێکدا مێژوو و ڕۆڵ و کاریگەرى هونەرمەندی، لە نێوەندی هونەرى شانۆ و دراماى کوردی بەرز نرخاند، هەروەها ئەو خزمەتە زۆرەى لە ماوەى ژیانى خۆی پێشکەش بەهونەری کردووە بە شانازیی بۆ شارى هەولێر لە قەڵەمدا و هیواى سەرکەوتن و لەش ساغى و تەندروستى باش و بەردەوامبوونى لە کارى هونەرى بۆ خواست.
هەروەها، تیشكی خستەسەر مێژووی هونەری و ڕۆشنبیری شاری هەولێر، كە خاوەن مێژوویەكی دەوڵەمەند و پڕ لەداهێنان و سەدان كەڵە هونەرمەند و ڕۆشنبیر و نووسەری بەتوانایە، دڵنیایی دایە هونەرمەندان و نووسەران و ڕۆشنبیرانی شارەكە، وەك پارێزگای هەولێر، لە پێناو پەرەپێدان و بەرەوپێشبردنی هونەر و ڕۆشنبیری كوردی بە هەموو شێوەیەك پاڵپشت و هاوكاریان دەبێت.
ئەیام ئەکرەم ساڵی 1964 لە گەڕەكی خانەقای شاری هەولێر لەدایك بووە، ئەکتەرێکی کۆمێدیای کوردییە، تا ئێستا لە چەندین بەرھەمی سینەمایی، شانۆیی و تەلەفزیۆنی دەرکەوتنی ھەبووە و ڕۆڵی بەرچاووی هەبووە لە خزمەتكردنی هونەری كوردی و لە ساڵانی ھەشتاکانی سەدەی ڕابردووشدا دەستی بەکاری ھونەری کردووە و لە ساڵی 1988 پەیمانگای ھونەرەجوانەکان بەشی شانۆی لە شاری مووسڵ تەواوکردووە.