لە دیدارێکدا لەگەڵ ڕۆژنامەی (The Hollywood Reporter) لە پەراوێزی فێستیڤاڵی فیلمی دەریای سوور، ئایکۆنی سینەمای فەرەنسی (ژولیێت بینۆش) باسی لە یەکەم ئەزموونی دەرهێنانی خۆی کرد بۆ فیلمی “In-I In Motion”.
بینۆش کە بۆ ماوەی چوار دەیە لە سینەمای جیهانیدا درەوشاوەتەوە و خاوەنی خەڵاتی ئۆسکارە، لەم بەرهەمەدا دەگەڕێتەوە بۆ ساڵی ٢٠٠٧ و پڕۆژە هاوبەشەکەی لەگەڵ سەماشکی بەناوبانگ (ئەکرەم خان).
فیلمەکە دۆکیۆمێنتارییەکە لەسەر پرۆڤەکان و گەشتە هونەرییە سەخت و پڕ سۆزەکەیان بۆ بەرهەمهێنانی بەرهەمێکی سەما. بینۆش ئاماژەی بەوە کرد کە ئەم پڕۆژەیە ماوەی ١٥ ساڵە لە خەیاڵیدا بووە و دواجار توانیویەتی وەک دەرهێنەرێک کەرەستەکان کۆبکاتەوە.
بینۆش لە فێستیڤاڵەکەدا خەڵاتی ڕێزلێنانی تایبەتی پێ بەخشرا و بەشداری لە پانێڵی “ژن لە جوڵەدا” کرد.