خانمە ئەکتەر لیلی کۆلینز، ئەستێرەی زنجیرەی ناوداری “Emily in Paris”، بە ڕاشکاوی باسی لەو ئاڵنگارییانە کرد کە لە قۆناغی نوێی ژیانیدا ڕووبەڕووی بووەتەوە، ئەویش هاوسەنگکردنی بەرپرسیارێتی دایکایەتی و کارکردنە لە وەرزی پێنجەمی زنجیرەکەدا.
کۆلینز لە چاوپێکەوتنێکدا لەگەڵ ڕۆژنامەی “The Sun” گوتی: “دایکایەتی ئامانجێکی جیاوازی پێ بەخشیم، بەڵام هاوسەنگکردنی لەگەڵ کار کارێکی زۆر سەختە”.
ئاماژەی بەوەش کرد، بەهۆی کەمخەوی و ماندوێتییەکی زۆرەوە، داوای لە تیمی کارکردن کردووە کەمێک ڕەچاوی دۆخی بکەن، چونکە وەک جاران ناتوانێت بە ئاسانی دەقەکان لەبەردەکات.
لیلی کۆلینز لە کانوونی دووەمی ڕابردوودا لە ڕێگەی “دایکی جێگرەوە” بووە خاوەنی یەکەم منداڵی، و تەنها دوای چەند مانگێک دەستی کردەوە بە وێنەگرتنی وەرزی نوێی زنجیرەکەی لە ڕۆما و پاریس.