ڤان دیزڵ، ئەستێرەی ناوداری ئەمریکی، سوپرایزێکی بۆ هەوادارانی زنجیرە فیلمی “Fast & Furious” ڕاگەیاند و ئاشکرای کرد، ئەستێرەی تۆپی پێی پورتوگالی، کریستیانۆ ڕۆناڵدۆ، لە بەشی یازدەیەم و کۆتایی ئەم زنجیرەیەدا بەشدار دەبێت.
دیزڵ لە هەژماری فەرمی خۆی لە ئینستاگرام وێنەیەکی خۆی و ڕۆناڵدۆی بڵاوکردەوە و نووسیویەتی: “هەمووان پرسیاریان لێ دەکردم ئایا ئەو دەبێتە بەشێک لەم جیھانە؟ ئێستا دڵنیاتان دەکەمەوە کە ئەو کەسایەتییەکی ڕاستەقینەیە و ڕۆڵێکی تایبەتمان بۆ نووسیوە”.
ئەم هەواڵە لە کاتێکدایە کە هەندێک ڕاپۆرت باس لەوە دەکەن هێشتا سیناریۆی بەشی یازدەیەم بەتەواوی تەواو نەبووە و کۆمپانیای یونێڤێرساڵ هەوڵی کەمکردنەوەی بودجەی فیلمەکە دەدات، بەڵام بێگومان بوونی ڕۆناڵدۆ دەبێتە هۆی ڕاکێشانی بینەرێکی بێشومار بۆ سینەماکان.