دادگایەکی ویلایەتی نیو مەکسیکۆ بڕیاری ئازادکردنی ئەکتەری ناوداری ئەمریکی، تیمۆسی بوسفێڵدی دەرکرد، ئەمەش دوای هەفتەیەک لە دەستبەسەرکردنی لە ناوەندی گرتنی شارستانی لە ناوچەی بێرنالیلۆ.
بوسفێڵدی تەمەن ٦٨ ساڵ، کە پێشتر خۆی ڕادەستی دەسەڵاتداران کردبوو، ڕۆژی سێشەممە ٢٠ی کانوونی دووەمی ٢٠٢٦ لەبەردەم دادوەردا ئامادە بوو.
دادوەر بڕیاری دا بە کەفالەت ئازاد بکرێت، بەڵام بە چەند مەرجێکی یاسایی توند تا کاتی بەڕێوەچوونی دادگاییکردنەکەی. بوسفێڵد ڕووبەڕووی تۆمەتی مەترسیدار بووەتەوە کە پەیوەستن بە دەستدرێژی سێکسی بۆ سەر دوو منداڵی دووانەی تەمەن ١١ ساڵ.
پارێزەری تیمۆسی بوسفێڵد، لاری شتاین، ڕایگەیاند کە بریکارەکەی لە بارودۆخێکی دەروونی باشدایە و گەڕاوەتەوە لای هاوسەرەکەی، ئەکتەری ناودار مێلیسا گیلبێرت.
لە کاتی دانیشتنی دادگادا، مێلیسا گیلبێرت و خێزانەکەی ئامادە بوون و بە گریان و دڵخۆشییەوە پێشوازییان لە بڕیاری ئازادکردنی کرد. مێلیسا پێشتر نامەیەکی پشتگیری بە واژۆی ٧٥ کەسەوە پێشکەشی دادگا کردبوو بۆ ئەوەی هاوسەرەکەی ئازاد بکرێت.