دەرهێنەری ناوداری جیهانی کریستوفر نۆلان لە چاوپێکەوتنێکی نوێیدا لەگەڵ گۆڤاری “Variety”، نیگەرانییەکی زۆری خۆی دەربڕی سەبارەت بەو دەنگۆیانەی باس لە ئەگەری یەکگرتنی نێوان کۆمپانیاکانی وارنەر برازەرز و نێتفلێکس دەکەن.
نۆلان کە بە یەکێک لە پارێزەرە سەرسەختەکانی پەخشکردنی فیلم لە سینەماکاندا ناسراوە، پێی وایە ئەم هەنگاوە دەبێتە هۆی لاوازکردنی پیشەسازی سینەما و نەمانی کێبڕکێی ئازاد. ئەو دەڵێت: “لەدەستدانی ستۆدیۆیەکی گەورەی وەک وارنەر برازەرز گورزێکی کوشندەیە بۆ پیشەسازییەکە”، چونکە ئەمە دەبێتە هۆی کەمبوونەوەی هەلی کار و دروستبوونی قۆرغکاری لە بازاڕدا.
نۆلان ئاماژەی بەوە کرد، ستۆدیۆ نەریتییەکان پێویستە پارێزگاری لە “پەنجەرەی نمایشی سینەمایی” بکەن، چونکە ئەمە تەنیا ڕێگەیە بۆ مانەوەی فیلمە گەورەکان بەو شکۆیەی شایەنیەتی.
ئەو پێی وایە گۆڕینی ستۆدیۆکان بۆ تەنها پلاتفۆرمی دیجیتاڵی، کوالێتی بەرهەمهێنان دادەبەزێنێت. لە کاتێکدا نۆلان خاوەنی چەندین فیلمی مێژووییە وەک “Oppenheimer” و “Interstellar”، ئێستا ئامادەکاری دەکات بۆ فیلمە نوێیەکەی بە ناوی “The Odyssey” کە بڕیارە لە تەمموزی ٢٠٢٦ نمایش بکرێت.
ئەم فیلمە نوێیەی نۆلان کۆمەڵێک ئەستێرەی گەورەی وەک “مات دەیمۆن، ئان هاساوای، تۆم هۆڵاند و زێندایا” لەخۆدەگرێت و چاوەڕوانییەکی زۆری لەسەرە، بەڵام هاوکات نۆلان لە هەوڵدایە هۆشیاری بداتە هاوپیشەکانی کە ڕێگە نەدەن تەکنەلۆژیا جێگەی ئەزموونی ڕاستەقینەی سینەما بگرێتەوە.