جاکۆب ئێلۆردی، ئەکتەری گەنج و بەناوبانگی ئوسترالی کە تەمەنی گەیشتۆتە 28 ساڵ، لە چاوپێکەوتنێکی نوێدا لەگەڵ(CBS Sunday Morning) هۆکاری دوورکەوتنەوەی تەواوەتی خۆی لە تۆڕە کۆمەڵایەتییەکان ئاشکرا کرد.
لە سەردەمێکدا کە ناوبانگی ئەکتەرەکان بە ژمارەی فۆڵۆوەرەکان دەپێورێت، ئێلۆردی بڕیاریداوە هەموو ئەکاونتەکانی لە تویتەر و ئینستاگرام دابخات و تەنیا جەخت لەسەر هونەری نواندن بکاتەوە.
ئەو دەڵێت: “خەونی من تەنیا ئەوە بوو ببمە ئەکتەر و بەشداری فیلم بکەم، ئێستا ئەوەم هەیە و بۆ من بەسە.”
ئێلۆردی کە بەهۆی زنجیرەی (Euphoria) و فیلمی (The Kissing Booth) ناوبانگی دەرکرد، ئێستا یەکێکە لە کاندیدە بەهێزەکانی ئۆسکار و خەڵاتی (Critics Choice)ـی بۆ باشترین ئەکتەری یاریدەدەر بردۆتەوە.
ئەو جەخت دەکاتەوە کە نایەوێت ژیانی تایبەتی خۆی لەپێناو پیشەسازی سینەمادا لەدەست بدات و دەیەوێت سنوورێکی ڕوون لە نێوان کارەکەی و ژیانی دەرەوەی کامێرا هەبێت.
سەرکەوتنی دوایین فیلمی کە مارگۆت ڕۆبی تێیدا بەشدارە، سەلماندی کە دەکرێت ئەستێرەیەکی درەوشاوە بیت بەبێ ئەوەی لە جیهانی دیجیتاڵیدا ئامادەییت هەبێت.
ئەم هەڵوێستەی ئێلۆردی وەک یاخیبوونێک دژ بە باوی ئێستای هۆلیوود دەبینرێت، کە تێیدا ئەکتەران ناچار دەکرێن هەموو وردەکارییەکی ژیانیان بە گشتی بکەن.