خۆشنووسی ناسراوی کورد، شیت مەخمووری ئەمڕۆ دووشەممە لە تەمەنی 60 ساڵیدا کۆچی دوایی کرد. بەو هۆیەوە وەزارەتی ڕۆشنبیری و لاوان سەرەخۆشی ئاراستەی کەسوکار و هاوڕێ و دۆستانی دەکات.
شیت حاجی سەلیم مەخمووری ناسراو بە “شیت مەخمووری”، ناوێکی دیاری هەولێر بوو، ئەو یەکێک هونەرمەندانە بوو، هونەرەکەی کردبووە هونەری خەڵک و بە کردەوە خستبووییە خزمەتی خەڵکەوە.
شیت مەخمووری، لە خێزانێکی کوردپەروەر پەروەردەبوو، برایەکی شەهید بووە و خۆیشی لە 1981 لە لایەن ڕژێمی بەعسەوە دەستگیر کراوە و دواتر لە ئەبوغرێب زیندانی بووە.
لە ماوەی ژیانیدا، بەهرەی خۆشنووسییەکەی وایکردبوو، ببێتە خۆشەویستی خەڵک و هەمیشە وەک خۆشەویستی بۆ هونەرەکەی فلچەی بەکاردەهێنا.
یاد و یادگاری هونەرمەندی کۆچکردوو شیت مەخمووری هەمیشە زیندوو بمێنن و ناوە گەشەکەی لە مێژووی هونەری خۆشنووسی لە هەولێردا بۆ هەمیشە بە نەمری دەمێنێتەوە.