کیڤن ویلیامسۆن، دروستکەری زنجیرە فیلمە ترسناکە بەناوبانگەکەی“Scream”، ئاشکرای کرد کە بیرۆکە سەرەتاییەکان بۆ بەشی هەشتەمی فیلمەکە دەستیان پێکردووە.
ئەم لێدوانە لە کاتی نمایشی جیهانیی “Scream 7” لە لۆس ئەنجلۆس هات، کاتێک گوتی: “کاتێک لە شوێنی وێنەگرتنین، بیر لەوە دەکەینەوە کە چیرۆکی داهاتوو چی دەبێت.” هەروەها ئاماژەی بەوە کرد کە ئەکتەری سەرەکی، نیڤ کامبڵ، بیرۆکەیەکی سەرنجڕاکێشی بۆ بەشی هەشتەم هەیە.
نیڤ کامبڵ کە دوای دابڕانێک بەهۆی کێشەی داراییەوە، جارێکی تر بۆ بەشی حەوتەم گەڕاوەتەوە بۆ ڕۆڵی “سیدنی پریسکت”، بووەتە جێی خۆشحاڵی هەواداران.
لە بەشی حەوتەمدا، سیدنی هەوڵ دەدات ژیانێکی ئارام لەگەڵ خێزانەکەی بەسەر ببات، بەڵام جارێکی تر ڕووبەڕووی بکوژە دەمامکدارەکە (Ghostface) دەبێتەوە.
ویلیامسۆن جەختی کردەوە کە ئەگەر جەماوەر بیەوێت و بەشی حەوتەم سەرکەوتوو بێت، ئەوا بە دڵنیاییەوە “Scream 8” بەرهەم دەهێنن بۆ ئەوەی میراتی ئەم زنجیرە فیلمە ترسناکە بەردەوام بێت.