جیهانی سینەما بە جۆش و خرۆشەوە چاوەڕێی گەڕانەوەی زنجیرە فیلمی ناوداری “The Matrix” دەکات، بەڵام ئەمجارە بە گۆڕانکارییەکی مێژوویی و گەورە.
کۆمپانیای وارنەر برۆس ڕایگەیاند، دەرهێنەر و نووسەر درو گۆدارد ئەرکی نووسین و دەرهێنانی بەشێکی نوێی ئەم زنجیرەیەی پێ سپێردراوە.
ئەم پڕۆژەیە دەبێتە یەکەم فیلم لە مێژووی “ماتریكس”دا کە خوشکانی واچۆوسکی (The Wachowskis) سەرپەرشتی ڕاستەوخۆی دەرهێنانەکەی نەکەن، کە ئەوان بونیادنەری سەرەکی ئەم جیهانە خەیاڵییە بوون لە ساڵی 1999 و هەموو بەشەکانی ڕابردوویان دەرهێناوە.
درو گۆدارد کە پێشتر بە کارە سەرکەوتووەکانی لە فیلمی “The Martian” و “Cloverfield” ناسراوە، ڕایگەیاند، ئێستا خەریکی داڕشتنی سیناریۆکەیە.
ئەم هەواڵە بووەتە جێی سەرنجی هەوادارانی سینەما لە جیهاندا، چونکە زنجیرەی ماتریكس تەنها فیلمێکی ئاکشن نییە، بەڵکو فەلسەفەیەکی قووڵی لە پشتە سەبارەت بە ڕاستی و خەیاڵ و تەکنەلۆژیا.
گۆدارد ئاماژەی بەوە کرد کە چیرۆکە نوێیەکە ڕێز لە میراتی ڕابردووی فیلمەکە دەگرێت، بەڵام ڕوانگەیەکی نوێ و جیاواز پێشکەش دەکات کە ستۆدیۆکە زۆر سەرسام بووە پێی.
سەرەڕای ئەوەی هێشتا وادەی نمایشکردنی فیلمەکە و ناوی ئەکتەرە بەشداربووەکانی وەک “کیانو ڕیڤز” دیار نییە، بەڵام دەستپێکردنی ئەم پڕۆژەیە بە مانای قۆناغێکی نوێ دێت بۆ یەکێک لە کاریگەرترین زنجیرە فیلمەکانی مێژووی زانستی-خەیاڵی.