ئەکتەری ئەمریکی نوای وایلی توانی دەستکەوتێکی مێژوویی بێوێنە لە جیهانی تەلەفزیۆندا تۆمار بکات، دوای ئەوەی لە رێوڕەسمی دابەشکردنی خەڵاتەکانی ئەکتەرانی شاشە خەڵاتی باشترین ئەکتەری لە زنجیرە درامادا بەدەستهێنا.
وایلی بەهۆی ڕۆڵی دکتۆر مایکل ڕۆبیناڤیتش لە زنجیرە پزیشکییەکەی بەناوی “The Pitt” توانی ئەم سەرکەوتنە بەدەستبهێنێت.
بەمەش بووە یەکەم ئەکتەر لە مێژوودا کە بتوانێت لە یەک وەرزدا پێنج خەڵاتە گەورەکەی نواندن بباتەوە خەڵاتی ڕەخنەگران، ئێمی، گۆڵدن گڵۆب، Actor Award، و خەڵاتی کۆمەڵەی ڕەخنەگرانی تەلەفزیۆن.
جگە لە خەڵاتە تاکەکەسییەکەی وایلی، زنجیرەی “The Pitt” خەڵاتی باشترین تیمی نواندنیشی بردەوە. وایلی لەسەر شانۆ وێڕای دەربڕینی خۆشحاڵی خۆی، تیشکی خستە سەر وەرزی سێیەمی زنجیرەکە و ڕایگەیاند کە باس لە قەیرانی دڵنیایی تەندروستی لە ئەمریکا دەکات.
زنجیرەکە بە شێوازێکی زۆر واقیعی و بە کاتی ڕاستەقینە چیرۆکەکانی ژووری فریاکەوتن دەگێڕێتەوە. سەرکەوتنی وایلی و زنجیرەکەی نیشانەی گەڕانەوەی بەهێزی دراما پزیشکییەکانە بۆ لوتکەی بینین و دەستخۆشی ڕەخنەگران.