لە جیهانی سینەمادا، کێبڕکێی نێوان ستۆدیۆکان گەیشتووەتە لوتکە. ستۆدیۆی پیکسار بە فیلمی نوێی و ڕەسەنی خۆی بەناوی “Hoppers” ئامادەکاری دەکات بۆ تۆمارکردنی سەرکەوتنێکی گەورە.
پێشبینی دەکرێت ئەم فیلمە ئەنیمەیشنە لە یەکەم هەفتەی نمایشکردنیدا 88 ملیۆن دۆلار لەسەر ئاستی جیهان کۆبکاتەوە، ئەمەش بەرزترین ڕێژەیە بۆ فیلمێکی ڕەسەنی پیکسار لە دوای فیلمی “Coco” لە 2017ـەوە.
فیلمەکە چیرۆکی کچێک دەگێڕێتەوە کە مێشکی دەگوازێتەوە بۆ ناو ڕۆبۆتێکی شێوە بێبەر بۆ ئەوەی لەگەڵ ئاژەڵەکاندا قسە بکات.
نمرەی فیلمەکە لە ماڵپەڕی “Rotten Tomatoes” گەیشتووەتە 97٪، ئەمەش نیشانەی ڕەزامەندییەکی بێوێنەی ڕەخنەگرانە.
فیلمی “The Bride!” لە دەرهێنانی ماگی جیڵنهاڵ و بە بەشداری ئەکتەرانی وەک جێسی بەکلی و کریستیان بەیڵ، لە دۆخێکی قورسدایە. سەرەڕای ئەوەی فیلمەکە 80 ملیۆن دۆلاری تێچووە، بەڵام پێشبینی دەکرێت تەنها 16 بۆ 18 ملیۆن دۆلار لە ناوخۆی ئەمریکا کۆبکاتەوە.
ڕەخنەگران نمرەی مامناوەندیان بە فیلمەکە داوە و دەوترێت کە دەرهێنەرەکە لەژێر فشاری کۆمپانیای وارنەر برەزدا بووە بۆ لادانی هەندێک دیمەنی توندوتیژ. فیلمەکە کە ئیلهامی لە“The Bride of Frankenstein”ی ساڵی 1935 وەرگرتووە، زیاتر پەیامێکی فێمینیستی و سیاسی لەخۆدەگرێت، ئەمەش وایکردووە بینەرانی وەک فیلمێکی ئەنیمەیشنی خێزانیی وەک “Hoppers” بە پەرۆش نەبن بۆی. ئەم جیاوازییە گەورەیە لە داهات و ڕەزامەندی بینەران، نیشانی دەدات کە چیرۆکە ڕەسەن و سادەکان هێشتا لە لای جەماوەر لە پێشترن.