وەرزی چوارەمی زنجیرە ئەنیمەیشنی بەناوبانگی جیهانی “Invincible” لەسەر ئاستی جیهان دەستی بە نمایش کرد و لە هەمان کاتدا پێشوازییەکی گەرمی لێکرا.
ئەم وەرزە نوێیە لە 18ـی ئازاری 2026 لەسەر پلاتفۆرمی “پڕایم ڤیدیۆ” بڵاوکرایەوە. پلاتفۆرمەکە لە هەنگاوێکی نوێدا سێ ئەڵقەی یەکەمی بەسەریەکەوە بڵاوکردەوە، کە ئەوەش گەورەترین بڵاوکردنەوەی هاوکاتە لە مێژووی ئەم بەرهەمەدا.
بڕیارە هەفتانە ئەڵقەیەکی نوێ تا کۆتایی مانگی نیسان بڵاوبکرێتەوە، بەجۆرێک ئەڵقەکانی چوارەم تا هەشتەم هەموو ڕۆژانی چوارشەممە نمایش دەکرێن.
چیرۆکی ئەم وەرزە کە لە 8 ئەڵقە پێکدێت، تیشک دەخاتە سەر قۆناغێکی نوێ لە ژیانی “مارک گرایسن”، تێیدا ڕووبەڕووی لێکەوتەکانی وەرزی سێیەم دەبێتەوە.
لەم وەرزەدا جەنگی “فیلترۆمایت” دەست پێدەکات کە گەورەترین جەنگی گەردوونییە لە مێژووی زنجیرەکەدا.
ڕەخنەگران ئاماژە بەوە دەکەن، ئەم وەرزە پڕە لە ئەکشن و قووڵی سۆزداری، هەروەها کارەکتەری “سراگ” وەک نەیاری سەرەکی و “دیناسۆر” وەک کارەکتەرێکی نوێ، ڕەهەندی جیاواز و توندوتیژی زیاتر دەبەخشنە ڕووداوەکان.