تایلۆر سویفت، گۆرانیبێژی ناوداری جیهانی، دەستی بە ئامادەکارییەکانی بۆ ئەلبوومی نوێی “TS13 ” کردووە، کە بەهۆی ژمارە 13وە گرنگییەکی تایبەتی لای هەوادارانی هەیە.
سەرچاوەیەکی نزیک لە سویفت بۆ گۆڤاری Us Weekly ڕایگەیاندووە، ئەو ئێستا تەنیا سەرنجی لەسەر لایەنە داهێنەرییەکانی کارەکەیە و هیچ پەستانێکی لەسەر نییە بۆ بڵاوکردنەوەی خێرای ئەلبوومەکە.
ئەم ئەستێرەیە دوای دوو ساڵ گەشت و ماندووبوون لە جۆلەی Eras Tour، ئێستا بەردەوام هەوڵ دەدات کاتەکانی لەگەڵ ترافیس کێڵسی دەستگیرانی بەسەر ببات.
کێڵسی لە چاوپێکەوتنێکدا ئاماژەی بەوە کرد، سویفت بەردەوام خەریکی نووسینی ئاواز و هۆنراوەی نوێیە و کارکردنی ئەو بۆ دەوروبەرەکەی ئیلهامبەخشە.
سویفت لەم هاوینەدا زیاتر بایەخ بە ژیانی تایبەتی خۆی دەدات و ئامادەکاری بۆ زەماوەندەکەی دەکات.
سەرچاوەکان جەخت دەکەنەوە کە هیچ پلانێک بۆ گەشتێکی جیهانی گەورە لەگەڵ ئەم قۆناغە نوێیەدا نییە، بەڵکو مەبەست لێی ڕەخساندنی دەرفەتێکە بۆ حەسانەوە و داهێنان بە ئازادی پێش دەستپێکردنی پڕۆژە گەورەکان و ژیانی هاوسەری.