ئەمڕۆ فێستیڤاڵی کورتە فیلمی کوردی لە سلێمانی دەستپێدەکات

ئێوارەی ئەمڕۆ شەممە، شاری سلێمانی دەبێتە مەڵبەندی کۆبوونەوەی سینەماکاران و فێستیڤاڵی کورتە فیلمی کوردی لە سیتی سینەما دەستپێدەکات.

فێستیڤاڵەکە لەلایەن بەڕێوەبەرایەتی گشتی ڕۆشنبیری و هونەری سلێمانی/ بەشی هونەری سینەما ڕێکخراوە و دەرگای هاتن بۆ هەمووان بەردەوام واڵایە. پڕۆسەی بەڕێوەبردنی هونەریی فێستیڤاڵەکە بە ڕێکەوت حەمە تۆفێق سپێردراوە، جەبار موحەممەد وەک بەڕێوەبەری بەشی هونەری سینەمای سلێمانی، سەرپەرشتی گشتی و بەڕێوەبردنی فێستیڤاڵەکە لەئەستۆ دەگرێت.

ئەم چالاکییە هونەرییە کە ماوەی 3 ڕۆژ دەخایەنێت، بە پاڵپشتی دارایی چەندین لایەنی وەک گروپی کۆمپانیاکانی هەڵەبجە، ئانزۆ فاوەندەیشن، قەیوان گروپ، میترۆنۆم پرۆداکشن، کۆمپانیای باڵوو و ڕێستۆرانتی میگ میگ بەڕێوە دەچێت.

لە ماوەی ڕۆژانی فێستیڤاڵەکەدا، 29 کورتە فیلم و چیرۆکی جیاواز نمایش دەکرێن. لە دیارترین ئەو فیلمانەی کە کێبڕکێ دەکەن بریتین لە: “نامەحرەم” لە دەرهێنانی سەید پەیام حوسەینی، “The Benches are Lonely” لەلایەن ئومێد نیکرۆ، “جەژن” لە دەرهێنانی نەوید زارێ، “Chimpanzee” لەلایەن ئەیوب گوڵکار، و “پەرژین” لە دەرهێنانی ساکار عوسمان.

هەروەها لیستەکە چەندین بەرهەمی دیکەی وەک “Great Symposium” لەلایەن تاریق تۆفێق، “Domestic” لەلایەن نیما عەبدولعەزیمی، “گەڕان” لەلایەن مەعسوم تاشکین، و “A Different Perspective” لە دەرهێنانی شارۆ شۆڕش لەخۆ دەگرێت.

فیلمەکانی دیکەی وەک “زام” لەلایەن سیاوەش وەزیری، “Full Name” لەلایەن ئەندام ئەمین، “First Date” لەلایەن ڕازیار تۆفێق، “چی ڕوویدا” لەلایەن ڕێبەر ڕابەر، و “سپی وەک سوور” لەلایەن کەریمۆک غەفوور نمایش دەکرێن. جگە لەمانە، فیلمەکانی “The Tailor” لەلایەن بەرزان یونس، “Swear” لەلایەن فەریدە نادری، “A Dance for Freedom” لەلایەن سالم سەڵەواتی، “کوڕ” لەلایەن سامان حوسێن پوور و “Aysha” لە دەرهێنانی جەنگیز ئاکایگون بەشدارن.

ئەرکی پێشکەشکاریی فێستیڤاڵەکە بە هەردوو کەسایەتی هونەری ئاسۆس جاف و ئاکام ئەنوەر سپێردراوە. هەروەها لیژنەی دادوەری کە لە هونەرمەندان دانا کەریم، زانیار فەتاح، و شاخەوان عەبدوڵڵا پێکهاتوون و بەپێی ئەزموونی خۆیان هەڵسەنگاندن بۆ بەرهەمەکان دەکەن.

لە کۆتایی ڕۆژی فێستیڤاڵەکەدا، تەنیا ئەو فیلمانەی کە بە باشترین دەستنیشان دەکرێن، خەڵاتەکان بەدەست دەهێنن.