شاکیرا، ئەستێرەی جیهانیی، شێوازێکی زۆر توند بۆ پەروەردەکردنی دوو کوڕەکەی پەیڕەو دەکات و ڕێگەیان پێنادات مۆبایلی زیرەک بەکاربهێنن.
ئەو دەڵێت منداڵەکانی تەنیا لەژێر چاودێرییەکی ورددا دەتوانن ئامێرە دیجیتاڵییەکان بەکاربهێنن و تەنانەت بینینی یوتیوبیشیان لێ قەدەغە کراوە.
شاکیرا پێی وایە پێویستە منداڵەکانی لە جیهانی ڕاستەقینەدا بژین و بەردەوام سەرقاڵی ئەوە نەبن کە خەڵک لە ئینتەرنێتدا چی دەڵێن یان چ جۆرە دەنگۆیەکیان دەربارە بڵاو دەکرێتەوە.
ئەم خانمە هونەرمەندە لە لێدوانێکدا گوتی: “پێویست ناکات منداڵەکانم بە دوای ناوی خۆیان، یان ناوی من و باوکیاندا بگەڕێن”، مەبەستی پاراستنیانە لەو هەواڵە ناڕاست و بێزارکەرانەی لە تۆڕە کۆمەڵایەتییەکان بڵاو دەبنەوە.
شاکیرا دەیەوێت منداڵەکانی فێری نرخی شتە سادەکان بن و دوور بن لە ئاڵودەبوون بە شاشەکانەوە.
خۆیشی ئاماژەی بەوە کردووە کە بەردەوام هەوڵ دەدات کەمترین کات لە ئینتەرنێتدا بەسەر ببات و تەنیا گوێ لە ڕای تیمی کارەکەی دەگرێت نەک کۆمێنتی خەڵکی نەناسراو.