هونەرمەندی کورد، رۆژدا، لە چوارچێوەی زنجیرە کۆنسێرتەکانیدا لە ئەوروپا، لە شەوێکی پڕ لە میوزیک و چڕینی سترانی ڕەسەن، لە شاری پاریسی پایتەختی فەڕەنسا چەند وێنەیەکی سەرنجڕاکێشی دوایین کۆنسێرتی بڵاوکردەوە کە لە ڕێکەوتی 11ـی نیساندا سازی کردبوو.
رۆژدا کە بە یەکێک لە دەنگە هەرە کاریگەر و ڕەسەنەکانی باکووری کوردستان دادەنرێت، ئەم کۆنسێرتە تەنیا وێستگەیەک بووە لە زنجیرە چالاکییە هونەرییەکانی لە کیشوەری ئەوروپا. هاوکات کۆنسێرتەکانی بەردەوام دەبن و بۆ وەرزی هاوینی ئەمساڵیش، پلانێکی چڕوپڕی هەیە بۆ سازکردنی چەندین کۆنسێرت لە باکووری کوردستان و شارە جیاوازەکانی تورکیا.
ڕۆڵی رۆژدا لە هونەری کوردیدا تەنیا وەک گۆرانیبێژێک نابینرێت، بەڵکو ئەو وەک یەکێک لە پارێزەرانی شوناسی نەتەوەیی و فۆلکلۆری کوردی لە باکووری کوردستان دەناسرێت.
رۆژدا لە کاروانە هونەرییەکەیدا کە لە گرووپی “گوڵێن خەرزان”ـەوە دەستی پێکرد توانیویەتی سترانە کۆن و فۆلکلۆرییەکانی ناوچەی بۆتان و سەرجەم ناوچەکانی باکوور بە شێوازێکی مۆدێرن و پارێزراو بژێنێتەوە، بەجۆرێک کە نەوەی نوێش پێوەی پەیوەست ببن.
لە قۆناغە سەختەکانی خەباتی کولتووری کوردیدا، رۆژدا یەکێک بوو لەو دەنگانەی کە بە زمانی دایک و بە چڕینی گۆرانی ڕووبەڕووی سڕینەوەی کولتووری بووەوە. گۆرانییەکانی ئەو تەنیا بۆ کات بەسەربردن نین، بەڵکو گوزارشت لە ئازار، هیوا و مێژووی گەلەکەی دەکەن.
دەنگی رۆژدا سنوورە دەستکردەکانی بەزاندووە؛ ئەو لە هەر چوار پارچەی کوردستان و لە ناو ڕەوەندی کوردیش لە ئەوروپا، پێگەیەکی جەماوەریی بەهێزی هەیە. ستایلە تایبەتەکەی کە تێکەڵەیەکە لە هەژان و سۆز، وای کردووە ببێتە یەکێک لەو هونەرمەندانەی زۆرترین بینەریان هەبێت.
رۆژدا نموونەی ژنێکی بوێر و سەرکەوتووە لە کایەی هونەریدا، کە توانیویەتی بەسەر بەربەستە کۆمەڵایەتی و سیاسییەکاندا سەربکەوێت و ببێتە قوتابخانەیەک بۆ زۆرێک لەو کچانەی دەیانەوێت لە بواری میوزیکی ڕەسەنی کوردیدا کار بکەن.