ڕاوێژکاری دارایی و ئابووریی سەرۆک وەزیرانی عێراق، مەزهەر محەمەد ساڵح، میکانیزمی ڕووبەڕووبوونەوەی قەیرانی دارایی و دابینکردنی مووچەی فەرمانبەرانی لە قۆناغی داهاتوودا ڕوون کردەوە.
مەزهەر محەمەد به شەفەق نیوزی راگەیاند: بەهۆی بەردەوامیی شەڕ و کاریگەرییە ئەگەرییەکانی لەسەر هەناردەی نەوت، حکومەت لەوانەیە پەنا بباتە بەر تێکەڵەیەک لە ئامرازەکانی دارایی، لەوانە قەرزی ناوخۆیی و دەرەکی، بەتایبەت لە حاڵەتی پەسەندکردنی یاسای قەرزکردن لە پەرلەمان.
دەشڵێت: داوای ڕێکخستنەوەی ئەولەوییەتی خەرجییە گشتییەکان و بەکارهێنانی یەدەگی دراوی بیانی دەکرێت وەک گرەنتییەک بۆ پاراستنی جێگیریی لێشاوی دارایی و بەردەوامیی دابەشکردنی مووچە.
مەزهەر محەمەد ساڵح جەختی کردەوە کە جۆری قەیرانی ئێستا نەمانی سەرچاوە یان مەترسیی مایەپووچبوون نییە، بەڵکو قەیرانی ئیدارەدانی لێشاوی نەختینەی داراییە لە دۆخێکی نادیاردا، و دەوڵەت توانای کۆنترۆڵکردنی گوشارەکانی هەیە.
روونیشی کردەوه: سەرکەوتنی حکومەت لە کۆنترۆڵکردنی قەیرانەکە و خێراکردنی چاکسازییە ئابوورییەکان، عێراق بەهێزتر دەکات لە ڕووبەڕووبوونەوەی لێکەوتەکانی قەیرانە هەرێمییەکان و پاراستنی جێگیریی دارایی.
هەواڵی پێشوو