ڕێکخەرانی کۆڕبەندی ئابووریی جیهان، بەشداریکردنی عەباس عێراقچی، وەزیری دەرەوەی ئێرانیان لە کۆڕبەندەکەدا ڕەت کردەوە. ئەوان ڕایانگەیاند ساڵی ڕابردوو عێراقچی لە کۆڕبەندەکەدا بەشدار بووە، بەڵام ئەمساڵ بەهۆی سەرکوتکردنی خۆپێشاندەران لە ماوەی ڕابردوودا لەلایەن تارانەوە، نوێنەری ئەو وڵاتە شایستەی بەشداریکردن نییە.
کۆڕبەندی ئابووری و سیاسیی جیهانی، ساڵانە لە “داڤۆس”ی سویسرا کە ناوچەیەکی شاخاوییە بەڕێوە دەچێت. سەرۆک کۆمار و سەرۆک وەزیرانی وڵاتان، خاوەنی کۆمپانیا گەورەکان، سەرمایەدار و کەسایەتییە کاریگەرەکان تێیدا بەشدار دەبن و کێشەکانی ئابووری، کەشوهەوا، تەکنۆلۆژیا و سیاسەت تاوتوێ دەکەن.
