بەپێی داتا داراییەکانی بانکی ناوەندیی عێراق، یەدەگی دراوی بیانی وڵاتەکە لە ماوەی دوو هەفتەدا زیاتر لە دوو ترلیۆن دینار دابەزیوە. ئاستی ئەم یەدەگە لە ٢٣ی نیساندا ١٢٥.٦١٤ ترلیۆن دینار بووە، بەڵام لە کۆتایی هەمان مانگدا بۆ ١٢٣.٢٦٩ ترلیۆن دینار (نزیکەی ٩٣.٣ ملیار دۆلار) کەمبووەتەوە، کە ئەمەش دابەزینێکی بەرچاوە و تەنها لە ماوەی یەک هەفتەدا گەیشتووەتە دوو ترلیۆن و ٣٤٥ ملیار دینار.
نەبیل ئەلمەرسومی، شارەزای ئابووری، دووپاتی کردووەتەوە کە هۆکاری سەرەکیی بەردەوامیی دابەزینی ئەم یەدەگە دەرەکییە بۆ کەمبوونی داهاتی نەوتی عێراق دەگەڕێتەوە. ئەم پاشەکشەیەش هاوکاتە لەگەڵ هۆشدارییەکانی وەزارەتی نەوت سەبارەت بە ناسەقامگیریی بارودۆخی دارایی و ئابووری وڵاتەکە.
لەلایەکی دیکەوە، باسم محەمەد خودەیر، وەزیری نەوتی عێراق، هۆشداری داوە کە نائارامییەکانی ناوچەکە مەترسییان لەسەر ڕەوتی هەناردەکردنی وزە لە ڕێگەی گەرووی هورمزەوە دروستکردووە.
ناوبراو ڕوونیکردووەتەوە کە عێراق پێش کێشەکان مانگانە بە تێکڕا ٩٣ ملیۆن بەرمیل نەوتی هەناردە دەکرد، بەڵام بەهۆی گرژییەکانەوە، لە ماوەی مانگی نیساندا هەناردەکردنەکە بۆ تەنها ١٠ ملیۆن بەرمیل دابەزیوە.