هەندێک گۆڕانکاری لە قاچەکاندا رەنگە ئاماژە بن بۆ تێکچوونی سووڕی خوێن، کە پەیوەندی بە بەرزبوونەوەی ئاستی کۆلیستڕۆڵەوە هەیە. ئەمە حاڵەتێکی باوە و رەنگە بەبێ دەرکەوتنی نیشانەی روون پەرەبستێنێت، بەڵام مەترسیی تووشبوون بە نەخۆشییەکانی دڵ و جەڵتەی مێشک زیاد دەکات.
رۆژنامەی میرۆری بەریتانی بڵاویکردەوە، بەرزبوونەوەی کۆلیستڕۆڵ دەبێتە هۆی کەڵەکەبوونی پاشماوەی چەوری لەناو خوێنبەرەکاندا. ئەمەش دەبێتە هۆی تەسکبوونەوەیان و سنووردارکردنی رۆیشتنی خوێن بۆ بەشەکانی جەستە، لەنێویاندا قاچەکان.
مەترسیی بەرزبوونەوەی کۆلیستڕۆڵ لەوەدایە بەزۆری هیچ نیشانەیەکی دیار بەجێناهێڵێت. بۆیە کەسی تووشبوو رەنگە تا کاتی ئەنجامدانی پشکنینی خوێن یان دەرکەوتنی ئاڵۆزییەکانی تەسکبوونەوەی خوێنبەرەکان، هەستی پێ نەکات.
دەستەی خزمەتگوزارییە تەندروستییە نیشتمانییەکانی بەریتانیا جەختدەکاتەوە، پشکنینی خوێن رێگەی سەرەکییە بۆ ئاشکراکردنی بەرزبوونەوەی کۆلیستڕۆڵ. ئەو دەستەیە ئاماژە بەوەش دەکات، کەڵەکەبوونی پاشماوەی چەوری رەنگە ببێتە هۆی تووشبوون بە نەخۆشیی خوێنبەرە دەوروبەرییەکان.
نیشانەکانی سەر قاچەکان
نەخۆشیی خوێنبەرە دەوروبەرییەکان کاتێک روودەدات خوێنبەرەکانی گواستنەوەی خوێن بۆ ئەندامەکان تەسک دەبنەوە، ئەمەش دەبێتە هۆی کەمبوونەوەی گەیشتنی خوێن بە ماسولکەکانی قاچ.
ئازار لە کاتی پیاسەکردن لە دیارترین نیشانەکانی ئەم نەخۆشییەیە، چونکە تووشبوو هەست بە ئێش یان گرژبوونی قاچەکانی دەکات، کە زۆربەی کات دوای پشوودان بۆ چەند خولەکێک باشتر دەبێت. بەگوێرەی دەستەی خزمەتگوزارییە تەندروستییەکانی بەریتانیا، ئازارەکە رەنگە لە هەردوو قاچدا دەربکەوێت، بەڵام لە یەکێکیاندا توندتر بێت.
نیشانە ئەگەرییەکانی دیکە بریتین لە هەڵوەرینی قژی قاچ یان پێیەکان، دەرکەوتنی برین لە پێیەکان، لەگەڵ گۆڕانی رووکەشی پێست و بریقەداربوونی. هەندێک لە پیاوانی تووشبووش رەنگە بەدەست لاوازیی توانای سێکسییەوە بناڵێنن. ئەم نیشانانە بە مەرج نییە لە هەموو تووشبوویەکدا دەربکەون و هەبوونیان مانای ئەوە نییە بەشێوەیەکی ئۆتۆماتیکی کۆلیستڕۆڵ بەرزە، چونکە رەنگە بەهۆی کێشەی تەندروستیی دیکەوە بن.
کەی نیشانەکان مەترسیدار دەبن؟
دەستە بەریتانییەکە روونیکردەوە، نیشانەکانی نەخۆشیی خوێنبەرە دەوروبەرییەکان زۆربەی کات بە هێواشی پەرە دەستێنن. ئەو دەستەیە هۆشداریش دەدات دەرکەوتنی نیشانەکان بە شێوەیەکی کتوپڕ یان خێرا خراپبوونیان، رەنگە ئاماژە بێت بۆ کێشەیەکی مەترسیدار کە پێویستی بە هەڵسەنگاندنی بەپەلەی پزیشکی هەیە.
مەترسییەکانی نەخۆشییەکە تەنیا لە لاوازیی سووڕی خوێنی قاچەکاندا کورت نابێتەوە، بەڵکو پەیوەستە بە زیادبوونی ئەگەری تووشبوون بە نەخۆشییەکانی خوێنبەرە تاجییەکان، جەڵتەی دڵ و جەڵتەی مێشک. پزیشکان ئامۆژگاری دەکەن لە کاتی هەستکردن بە ئازاری بەردەوامی قاچەکان لە کاتی پیاسەکردن یان دەرکەوتنی برین کە ساڕێژ نابێت، سەردانی پزیشک بکرێت و پشکنینە پێویستەکان بۆ دیاریکردنی هۆکارەکەی دیاری بکرێن.
چۆن ئاستی کۆلیستڕۆڵ دادەبەزێندرێت؟
دەستەی خزمەتگوزارییە تەندروستییەکانی بەریتانیا رێنمایی دەکات شێوازێکی ژیانی تەندروست پەیڕەو بکرێت بەمەبەستی دابەزاندنی ئاستی کۆلیستڕۆڵ و کەمکردنەوەی مەترسیی نەخۆشییەکانی دڵ و خوێنبەرەکان.
رێنماییەکان بریتین لە کەمکردنەوەی خواردنی چەورییە تێرکراوەکان، وازهێنان لە جگەرەکێشان، سنووردارکردنی خواردنەوە کحولییەکان و ئەنجامدانی چالاکیی جەستەیی بە رێکوپێکی. پشکنینی خوێن بۆ دیاریکردنی بەرزیی کۆلیستڕۆڵ بە پێویست دەمێنێتەوە، چونکە ئەو نیشانانەی لە قاچەکاندا دەردەکەون رەنگە رەنگدانەوەی ئاڵۆزییەکانی تەسکبوونەوەی خوێنبەرەکان بن، نەک نیشانەی راستەوخۆی بەرزبوونەوەی کۆلیستڕۆڵ.