پسپۆڕێكی ناسراوی بواری خۆراك لە لێدوانێكیدا بۆ رۆژنامەی “تەلەگراف”ی بەریتانی باس لە گرنگیی زیادكردنی خەیار بۆ ژەمە خۆراكەكانی رۆژانە دەكات، بەهۆی سوودە تەندروستییەكانیەوە.
دكتۆر سارە پەرویر روونیكردەوە، خەیار “توخمی پۆتاسیۆم دەستەبەردەكات، كە دەبێتەهۆی دەركردنی سۆدیۆم و شلەمەنییە زیادەكان لە لەشدا”.
هەروەك مەگنسیۆمی تیایە، كە ماسولكە و دەمارەكان بەهێزدەكات، كاریگەرییەكانی ماندوێتی و فشار كەمدەكاتەوە، سەرەڕای بوونی ڤیتامین سی، كە پێویستە بۆ تەندروستیی پوك و پێست بەشێوەیەكی گشتی.
جگە لە بوونی ڤیتامین كەی كە یارمەتیی خوێن مەیین دەدات، هەروەها دانانی قاشی خەیار لەسەر پێویست یارمەتیدەر دەبێت لە كەمكردنەوەی كاریگەریی برین.
ئەو پسپۆڕە ئاماژەی بەوەشدا كە خەیار بڕێكی زۆر ئاوی تیایە، بەجۆرێك لەهەر 100 گرامێكی ئەو بەرهەمە رووەكیەدا 96 گرامی ئاوە، ئەمەش وایلێدەكات شێدار و خۆراكێكی باشی كالۆریی كەم بێت.
“پارچەیەك خەیار بە تیرەی شەش سانتیمەتر، تەنها 10 كالۆری و 1.2 گرام شەكری تیایە” بەپێی وتەی سارە، كە بە وتەی ئەو مانایوایە “نابێتەهۆی بەرزبوونەوەی ئاستی شەكر لە خوێندا”.
دووپاتیشیكردەوە، خەیار سەرچاوەیەكی باشی پێكهاتەی “كۆكوربیتاسین بی”یە، كە دەتپارێزێت لە نەخۆشییەكانی هەوكردن، دەمارەكان، شێرپەنجە و شەكرە لە جۆری دووەم.
پسپۆڕەكەی بواری خۆراك باسی لەوەشكرد كە دانانی دوو قاش خەیار لەسەر چاوەكان “ئەفسانەیەكی زوو” نییە، بەڵكو سوودبەخشە بۆ كەمكردنەوەی ئازار و هەڵاوسانی چاو، لەگەڵ ئەوەشدا دەتوانرێت بۆ چارەسەری سووتانێكی كەم بە خۆر بەكاربهێنرێت.
جگە لەوەی خەیار یەكێكە لە سەرچاوە دەوڵەمەندەكانی سیلیكا، كە كانزایەكە و رۆڵی گرنگ دەگێڕێت لە پارێزگاریكردن لە تەندروستیی قژ و دەموچاو و نینۆك.
لەگەڵ ئەوەشدا بەراورد بە سەوزە و میوەكانی تری “سەرچاوەیەكی بەهێزی خۆراكی” نییە، چونكە سەرەڕای سوودەكانی پێشووی، بوونی بڕێكی زۆر ئاو تیایدا، مانای وایە چڕیی سەرچاوە خۆراكییەكان تیایدا كەمترە بەراورد بە سەوزەكانی دیكە.