توێژینەوەیەکی نوێ ئاشکرایکردووە، ئەو بەکتریایانەی کە دەبنە هۆی هەوکردنی پووک، ئەگەری تووشبوون بە شێرپەنجەی سەر و ملیش زیاد دەکەن.
بەپێی ڕاپۆرتێکی “دەیلی هێڵث”، توێژەران بۆیان دەرکەوتووە کە زیاتر لە دەیان جۆری بەکتریا پەیوەندییان بە زیادبوونی ٥٠٪ـی مەترسی تووشبوون بە شێرپەنجەکانی سەر و ملەوە هەیە.
دکتۆر ڕیچارد هایس یاریدەدەری توێژەر لە زانکۆی نیویۆرک دەڵێت: “دۆزینەوەکانمان هۆکارێکی دیکە دەخەنە ڕوو بۆ پاراستنی خووی پاکوخاوێنی دەم و ددان، “شۆردن و بەکارهێنانی پەتی ددان نەک تەنها ڕێگری لە نەخۆشییەکانی پووک دەکات، بەڵکو ڕەنگە لە شێرپەنجەی سەر و ملیش بمانپارێزێت”.
توێژەران ئاماژەیان بەوە کردووە کە بەشێک لەو بەکتریایانە کە بەشدارن لە هەوکردنی سەختی پووک، هەوکردنەکە بە جۆرێکە کە دەتوانێت ئێسکی چەناگە و شانە نەرمەکانی دەوروبەری ددانەکانیش بخوات.
لە توێژینەوەکەدا هیچ زیادبوونێکی مەترسی تووشبوون بە شێرپەنجە لە ئەنجامی ئەو کەڕووە سروشتیانەی کە لە دەمدا دەبینرێن، نەدۆزراوەتەوە.