زیادبوونی کێش لە ماوەی دووگیانیدا شتێکی ئاساییە و پێویستە بۆ تەندروستی هەریەک لە دایک و کۆرپەلە، بڕی کێشی ئافرەت کە پێویستە زیاد بکات بەندە بە ڕێژەی بارستەی جەستەی پێش دووگیانی (BMI)، هەر بۆیە زیادبوونی کەم یان زۆر دەبێتە هۆی زیادبوونی ئەگەری ئاڵۆزییەکانی وەک کەمی کێشی لەدایکبوون، لەدایکبوونی پێشوەختە، شەکرەی دووگیانی، یان بەرزی پەستانی خوێن، دکتۆرە کەژان کاوە پسپۆڕی نەخۆشییەکانی ژنان و مناڵبوون ڕوونکردنەوەی زیاتر لەم بارەیەوە دەخاتە ڕوو:
– پێویستە لە کاتی دووگیانیدا کێشت چەند زیاد بکات؟
1- ئەگەر پێش دووگیانی کێشێکی تەندروستت هەبووبێت، بەگشتی پێشبینی دەکرێت لە ماوەی دووگیانیدا نزیکەی 11.5 بۆ 16 کیلۆگرام زیاد بکەیت.
2- ئەگەر کێشت کەم بوو، لەوانەیە پێویستت بە زیادبوونی زیاتر بێت واتە نزیکەی 12.5 بۆ 18 کیلۆگرام.
3- ئەگەر کێشت زیاد بوو، لەوانەیە کێشت کەمتر زیاد بێت واتە نزیکەی7 بۆ 11.5 کیلۆگرام.
– زیادبوونی کێش کەی ڕوودەدات؟
1- لە سێ مانگی یەکەمی دووگیانیدا زیادبوونی کێش بەزۆری کەم دەبێت، نزیکەی نیو کیلۆگرام بۆ 2 کیلۆگرام کۆی گشتی، تەنانەت هەندێک لە خانمان بەهۆی هێڵنجدان یان ڕشانەوە کەمێک کێشیان دادەبەزێت.
2- لە سێ مانگی دووهەم و سێهەمی دووگیانیدا زیادبوونی کێش زۆر بەرز دەبێتەوە، لەوانەیە بە تێکڕا هەفتانە نزیکەی نیو کیلۆگرام زیاد بکەیت.