ئەمڕۆ یەکشەممە، چەندین ڕووداوی ئەمنیی جۆراوجۆر لە بەغدای پایتەخت ڕوویدا، کە یەکێک لە ڕووداوەکان خنکانی گەنجێک بوو لە نزیک کافێیەک لە بەغدا، ئەمە جگە لە سووتانی کۆگاکان و سەرهەڵدانی ململانێی عەشایەری.
سەرچاوەیەکی ئەمنی بە میدیا ناوخۆییەکانی ڕاگەیاند، “گەنجێک لە ڕووباری دیجلە لە نزیک کافێی ئەلبەیرووتی ناوەڕاستی بەغدا خنکا، تیمەکانی گەڕان بەدوای دۆزینەوەی تەرمەکەدان”، ئەوەشی پشتڕاستکردەوە کە 3 کەس لەگەڵ کەسە خنکاوەکەدا بوون و هەموویان دەستگیر کراون، بە مەبەستی لێکۆڵینەوە چونکە گومان لە ڕووداوەکە هەیە.
لە ڕووداوێکی دیکەدا هێزێکی ئەمنی بەرەو ناوچەی کەمالیا ڕۆیشتن بۆ کۆنترۆڵکردنی ململانێیەکی عەشایەری کە تێیدا چەکی سووک و مامناوەند بەکارهێنرا.
ڕوونیشیکردەوە، “لە ئێستادا تەنها تەقە هەیە و هیچ زانیارییەک لەسەر هیچ زیانێکی گیانی نییە”.
هەر لەو چوارچێوەیەدا تیمەکانی بەرگری شارستانی لە ئێستادا خەریکی کۆنترۆڵکردنی ڕووداوی ئاگرکەوتنەوەن لەناو کۆگا بازرگانییەکانی پشت سندوقی ئیسکان لە ناوچەی شەقامی ئەلزەلال.
ئا:ج
