سەرۆکوەزیرانی لوبنان بۆ چەند پرسێک دێتە بەغدا

سەرچاوەکانی حکوومەتی لوبنان دیارترین دۆسیەکانیان ئاشکرا کرد کە نەجیب میقاتی سەرۆکوەزیرانی چاودێر لە سەردانەکەیدا بۆ بەغدا باسی دەکات.
ڕۆژنامەی “ئەلجمهوریە”ـی لوبنانی لە زاری ئەو سەرچاوانەوە بڵاویکردەوە، کە نەجیب میقاتی سەرۆکوەزیرانی چاودێر، لە کۆتایی ئەم هەفتەیەدا سەردانی بەغدا دەکات، وەڵامی بانگهێشتی هاوتا عێراقیەکەی، محەممەد شیاع سوودانی” دەداتەوە.
ڕاشیگەیاند، شاندێکی وەزاری کە پێکهاتوون لە وەزیری وزە، وەلید فەیاز، وەزیری ئابووری، ئەمین سەلام، وەزیری کشتوکاڵ، عەباس حاج حەسەن، و وەزیری پیشەسازی، جۆرج بوشکیان، جگە لە ژمارەیەک ڕاوێژکار، یاوەری میقاتی دەکەن بۆ عێراق.
ئاماژەی بەوەشکرد، “میقاتی لە بەغدا تاوتوێی کۆمەڵێک دۆسیەی هاوبەشی نێوان هەردوو وڵات دەکات، لەوانە بەردەوامبوونی دابینکردنی سووتەمەنی عێراقی بۆ لوبنان بۆ وێستگەکانی کارەبا و یەکلاییکردنەوەی ئەو ناکۆکیانەی لەبارەی بەرنامە داراییەکانییەوە سەرهەڵدەدەن”.
سەرۆکوەزیرانی عێراق دڵنیایی دابووە میقاتی، کە حکوومەتەکەی بەردەوام دەبێت لە پاڵپشتیکردنی لوبنان، بەڵێنیشی دابوو کە چارەسەری ئەم پرسانە بکات.
ئا:ج